صعوبة التخزين والتلف مخاوف تقلق البقالين من «شنط مصيلحى» التموينية

08:11 م | الاثنين 27 مارس 2017

تباينت آراء عدد من من البقالين التموينيين حول قرار وزير التموين والتجارة الداخلية بتعبئة كيلو السكر مع زجاجة الزيت فى شنطة بلاستيكية واحدة، لتوزيعها مع بداية الشهر المقبل للمواطنين، ففى الوقت الذى يرى فيه البعض منهم أن ذلك القرار سيحد من تلاعب بعض التجار، أعلن آخرون رفضهم القرار نظراً لعدم وجود مساحات كافية لتخزين تلك الشنط البلاستيكية، مشيرين إلى أن وجود الزيت إلى جانب السكر سيغير مذاقه.

يقول «محمد سمير»، صاحب بقالة تموينية بعين شمس: «القرار كويس بس هيكلف الدولة ميزانية تانية لأنه هيعمل كمية بالملايين، فكان الأول بيجى السكر فى (باكتة) والزيت فى كرتونة، لكن دلوقتى هيضطر يعمل شنطة مخصوصة للاتنين وده هيكلفهم كتير»، ويضيف «سمير»: «مشكلة القرار ده إن فى بعض الأحيان بيكون كيس السكر مفتوح أو مثلاً زجاجة الزيت بتكون مفتوحة نتيجة النقل من مكان لآخر فما حدش هيرضى ياخد الشنطة وبالتالى ده هيسبب أزمة وخاصة لو عدد الشنط على قد المواطنين». ويرحب «سيف النصر عبدالواجد»، صاحب محل بقالة، بالقرار لأنه سيجعل الأمور سهلة التداول بالنسبة للتاجر وللمواطن، إلا إنه يطالب بوضع تلك الشنط داخل «كراتين» للحفاظ عليها من التلف، على أن يُكتب عليها «ممنوع التداول فى السوق» للحد من تلاعب بعض التجار والتأكد من وصولها للمستحقين، ويقول: «لما الأكياس هتتحط داخل كرتون ده هيخليها سهلة فى التحميل والتخزين وهيقلل من حدوث تلف للسلع لأن ممكن الأكياس دى تتفتح وساعتها هكون أنا اللى مسئول وهتحاسب»، مضيفاً: «بطالب وزير التموين إنه يجتمع بالبقالين على مستوى المحافظة عشان نقترح عليه كل حاجة بحيث إن القرار يكون فى الآخر سليم ومُرضى لكل الأطراف».

ويقول ماجد نادى، المتحدث الرسمى باسم البقالة التموينية: «إحنا مع قرار إن التموين يكون سكر وزيت بس لكن بنرفض تعبئتهم مع بعض»، مشيراً إلى أن دمجهما معاً سيغير مذاق السكر، خاصة أن جودة الزيت فى التموين رديئة: «ماينفعش الزيت يتحط جنب السكر فى شنطة واحدة لأن الزيت بيكرف على طعم أى حاجة، خاصة إنه هيفضل فى المخزن طول الشهر، المواطن نفسه لما بييجى ياخد التموين بيطلب منى أفصل الزيت عن أى حاجة تانية»، مؤكداً أنه فى حالة تطبيق هذا القرار سيواجه أزمة فى تخزين تلك الشنط، ويتابع «بخزن مثلاً 10 طن سكر و500 كرتونة زيت وبحط كل حاجة فيهم فى مكان لوحده وبحطهم بطريقة معينة لكن إزاى دلوقتى هخزن مثلاً 1000 شنطة فوق بعضها وخاصة إن غطاء زجاجة الزيت مش بيكون قوى، والضغط عليها ممكن يفتحها، وبالتالى السكر اللى معاها هيتلف وده هيخلى الهالك أكتر بكتير من الأول».