طلاب «صيدلة» يطلقون حملة للتوعية بأمراض القلب

08:23 م | الأحد 02 أبريل 2017

عادات خاطئة نمارسها فى حياتنا اليومية عن جهل ربما تؤدى إلى الإصابة بأمراض خطيرة فى القلب، هذا ما أكده طلاب بكلية الصيدلة جامعة القاهرة، ولذا أطلقوا حملة «Ga-lup» لنشر الوعى داخل المجتمع للمساعدة فى الوقاية من أمراض القلب وأعراضها والتوعية بأسباب حدوثها.

بعد عدة أيام من طرح فكرة الحملة، قرر الطلاب عمل صفحة على موقع فيس بوك لتساعدهم على مشاركة الفكرة بدائرة أكبر، وحسب مريهان طلعت، إحدى الطلاب المسئولين عن الصفحة وطالبة بالفرقة الثالثة بالكلية: «بيشارك فى الحملة 48 طالب، واحنا بنحاول نفهّم الناس أسباب حدوث المرض وطرق الوقاية منه وأسهل الإسعافات الأولية اللى يقدروا يقوموا بيها لو حد قدامهم عنده أزمة قلبية أو حد أغمى عليه مثلاً».

التاسع من أبريل الحالى هو يوم انطلاق أولى فعاليات الحملة داخل كلية الصيدلة: «الحملة فيها جزء نفسى وجزء خاص بالتغذية وهدفنا الأول والأخير وهو إننا نعلّم الناس بعض الحركات اللى ممكن تنقذ حياة شخص مثل حركة إنعاش عضلة القلب من جديد لكن لو فيه شخص مريض بالقلب لازم يقعد فى وضعية سليمة ومايتحركش كتير».

جاءت تسمية الصفحة «Ga-Lup»، وهو اسم علمى غير معروف بين الناس، للفت الانتباه، كما أن للاسم دلالة مرتبطة بالهدف من الحملة: «أول جزء فى التسمية وهو Gallop معناه صوت نبض القلب وهو تعبان، وتانى جزء lub dub معناه صوت القلب الطبيعى وهو سليم، وإحنا ضمينا الاتنين مع بعض عشان ندل على الهدف هو إن المريض يرجع نبض قلبه سليم بعد التعب».