الطلاب عن «البوكليت»: التجربة ممتازة.. ولابد من مراعاة مدة الامتحان

10:36 م | الأربعاء 05 أبريل 2017

أبدى عدد من طلاب الثانوية العامة ارتياحهم الشديد لنظام الامتحانات الجديد المعروف باسم «البوكليت»، الذى طبقته وزارة التربية والتعليم على الطلاب أمس الأربعاء بشكل تجريبى، وذلك بعد المشاكل الكثيرة التى حدثت فى الأعوام الماضية فى امتحانات الثانوية العامة من اختراق للقوانين واستخدام وسائل الغش من الكاميرا لتصوير الامتحانات وتسريبها عبر وسائل التواصل الاجتماعى، الأمر الذى دفع الكثيرين للمطالبة بتغيير نظام الثانوية العامة لتفادى مشكلات النظام القديم.

محمد دياب، طالب فى الصف الثالث الثانوى بمدرسة الثانوية بنين بالجيزة، يقول: «لازم يراعوا مدة الامتحان البسيطة أثناء وضع الأسئلة، وخصوصاً إن عددهم نحو 50 سؤال والوقت المخصص لحلهم قليل أوى». {left_qoute_1}

وتابع «دياب»: «جميع المدرسين قالوا لنا إن الأسئلة هتكون فى متناول الطالب المتوسط، طيب إزاى يكون فى سؤال تعبير بيحتاج لوقت أكتر من نص ساعة، وفى الآخر يقولوا إنه مش محتاج وقت».

أحمد ماهر، طالب بالصف الثالث الثانوى، يؤكد أن هناك صعوبة فى أن يغش أى طالب من زميله، معتبراً هذا النظام أسهل من النظام القديم، لأن الأسئلة تأتى واضحة وصريحة، وتعتمد بشكل أكبر على الاختيارات».

فيما يقول محمود ياسر: «معظم زملائى الذين حضروا الامتحان النهارده، اعتقدوا أنهم ممكن يغشوا، وأخدوا موضوع الامتحان ده بنوع من التهريج، لكن بعد ما دخلنا اللجنة لقيت كل واحد قاعد يبص فى ورقته ومش عارف يغش ولا عارف حتى يتكلم مع أى حد من زملائه». بينما رأى عادل الهادى، طالب فى الصف الثالث الثانوى، أن هذا النظام أفضل من النظام القديم، مؤكداً أن هناك وفرة فى الوقت وهو ما وضحه بقوله: «هذا النظام أفضل من النظام القديم بكتير جداً، خصوصاً أن الاختيارات الموجودة فى أغلب الأسئلة تسهم فى تقليل الوقت المستخدم للإجابات، انت بتحل الامتحان بسهولة قوى، علشان كدا بتسهل علينا الإجابة، لكن محتاجين فقط أن أماكن الإجابة تكبر شوية علشان لو فى إجابة غلط نقدر نصححها». ويتابع «عادل» منتقداً وقت التدريب على نظام البوكليت، قائلاً: «المفروض أنهم كانوا يطبقوا الامتحان ده علينا من أول السنة، مش قبل الامتحان بشهرين، وكمان لازم يطبقوا الامتحان ده على الطلاب اللى فى الصف الثانى علشان لما يوصلوا الصف الثالث الثانوى يكونوا اتعودوا عليه».