هات «طبلتك».. وتعالى شارك معانا

08:13 م | الجمعة 28 أبريل 2017

«لو بتحب تطبل وعايز تتدرب وتظبط إيقاعك، اشترى طبلة وتعالى شارك معانا».. جزء من إعلان لورشة تدريبية يُقدّمها مركز «جرمافون» بالمعادى، لتعليم الطبلة الشرقى لمن يرغب فى تعلمها. تحرص الورشة على تعليم المتدربين استخدام أصابعهم بشكل صحيح فوق جلد الطبلة المشدود بعناية، وذلك حسب أمير عزت، مدير المركز: «مش أى خبط يبقى طبلة، ومش أى دوشة بتتعمل من الطبلة ينفع تتسمع.. الطبلة دى فن، مش أى حد يقدر يحترف اللعب عليها».. مؤكداً أن المركز يداوم على تقديم هذه الورشة بشكل دورى كل شهر منذ يناير الماضى. «الإقبال كبير من الشباب والبنات»، على حد قول «عزت» الذى يُحدد يوم الاثنين من كل أسبوع فى السابعة مساءً لورشة «الطبل البلدى»، كما يُقدّم المركز دورات أخرى لتعليم الآلات الموسيقية المختلفة «بيانو وعود وناى وجيتار». ويحضر كل متدرب بالطبلة الخاصة به: «اللى يشارك فى الورشة لازم يكون معاه طبلة علشان يفضل يدرب على الإيقاعات اللى أخدها فى الورشة طوال الأسبوع»، موضحاً أن المركز يُقدّم طبلة لمن لا يملكها. رانيا عمر عازفة إيقاع، ومدربة بالمركز تؤكد أن المركز لا يدرب على الطبلة فقط، بل يعلم إيقاعات مختلفة لمن يريد: «الطبلة فن ومحتاجة تدريب كويس، والدق عليها محتاج إلى إحساس ورقى حتى تصدر إيقاعات تُنغم الحاضرين».