شعار ربات البيوت: «اشترى.. خزنى.. خللى»
حملات بين السيدات لتخزين الخضار استعداداً لرمضان
تستعد السيدات قبل حلول شهر رمضان، بتخزين أنواع مختلفة من الخضار والياميش خوفاً من ارتفاع الأسعار، ولتوفير جهدها خلال الشهر، كما تهتم الكثيرات بإعداد المخللات فى البيت، التى تفتح شهية الصائمين على مائدة الإفطار.
فى مثل هذه الأيام تقيم هناء سعد ربة منزل، معسكراً داخل البيت، لا تنشغل سوى بتخزين الطعام: «باخزن سكر وزيت وسمنة وورق عنب.. والخضار باجيبه أنضفه وأعمله أكياس وأحطه فى الفريزر»، تجهيزات اعتادت عليها كل عام: «كل يوم باروح أشترى حاجة معينة بتاع 6 أو 7 كيلو، وأسهر عليها أنضف وأفرز»، بالإضافة إلى تخزينها للحم والفراخ، خوفاً من ارتفاع أسعارها.
«مابقدرش أنزل فى الصيام الصبح الجو بيبقى حر»، أكدت هناء أن الحرارة المرتفعة من ضمن الأسباب التى تدفعها لتخزين الطعام: «أول ما ينزل الياميش باجيب.. لكن الكمية هتبقى قليلة السنة دى، مش زى كل سنة، علشان الأسعار اللى غليت»، ولم تنسَ تخليل الزيتون الأخضر والأسود والليمون والخيار: «العيال مايعرفوش ياكلوا من غير مخلل.. ويا دوب بنخزن من دلوقتى علشان يلحق يستوى ويبقى حلو على رمضان».
منى حسن، 29 عاماً، تقوم بتفريغ ثلاجتها قبل 30 يوماً من رمضان، لتخزين البسلة، الجزر، الكوسة، الفاصوليا، بالإضافة إلى الطماطم التى تصنع منها صلصة وتحفظها فى برطمانات، كما أنها تُخزّن البلح: «البلح لازم يتنضف بالاتنين كيلو، وأشيله، وعلى نص رمضان أجيب تانى، وأنضف وأشيل علشان أطلع أعمله خشاف على طول ويسهل عليا»، كما تسعى إلى تخزين بعض أنواع المخللات كـ«الخيار، الليمون».
أما مروة محمد فتحرص على تخزين الخضار: «الورق العنب ده أساسى علشان العزومات، وكمان جوزى بيحب المحشى جداً».. كما أنها تقوم بعمل المخللات: «بتبقى أنضف من بره، المحلات مابيهتموش بيها فى رمضان».