شذى عن كليب الواد ده بتاعي: العيب مش عليهم.. لازم نوقف المهزلة دي

04:48 م | الأربعاء 03 مايو 2017

علقت الفنانة شذى، على لقاء والدة الطفلتين "مريم وشهد"، صاحبتا كليب "الواد ده بتاعي"، مع الإعلامية ريهام سعيد على شاشة "النهار"، وذلك عبر حسابها على "فيس بوك".

وكتبت شذى: "لازم تشوفوا آخر 30 دقيقة، وتشوفوا إحنا وصلنا لإيه، والانحدار وصل لإيه، أنا مش بعيب في أشخاص، كامل الاحترام ليهم، أنا مشكلتي إن بجد الموضوع وسع وبقى قرف جدا، مش كل واحد شغال في العجل أو العقارات، طبعا أنا مقتبسة المصطلح ده من مدام الشبح المنتجة العظيمة، أو عنده فيلا في الهضبة وراكب عربيه بـ350 ألف جنيه، يبقى فنان".

وتابعت شذى: "ورحمة ماما أنا بطني قلبت من المستوى المتدني اللي بقينا فيه، كنت فاكرة إن الناس دي شخصيات في أفلام الكاتب الكبير الله يرحمه محمود أبوزيد والعظيم المرحوم محمود عبدالعزيز".

وأضافت شذى: "بس العيب مش عليهم، إحنا اللي وصلنا نفسنا لكده، وإحنا كفنانين لينا إيد في سكوتنا وسلبيتنا اللي خلتنا ننحدر بالشكل ده، من فضلكوا أنا محتاجة أعرف مقترحات عشان الأنواع دي متتكاثرش ونرجع تاني لينا الريادة، في إن إحنا نقدم فن محترم، وأنا بتكلم بجد جدا، وبصفتي عضو عامل في نقابة المهن، محتاجة أعرف عضويتي دي تفيد بإيه يقدر يوقف المهزلة دي".

وزادت شذى: "كده كتير قوي بجد، وبطلب من زملائي الفنانين اللي بجد والمنتجين المحترمين نشوف حل وبسرعة، لأن الموضوع عدى حدود المسموح، وكلامي مش على الأغنية دي بس، أنا بتكلم على كل الأغاني اللي زي كده، والإسفاف اللي وصلنا ليه، هي مغلطتش لما قالت كلوا بيقول وبيغني أوحش من كده، هي عندها حق، إحنا بقى نتصرف ازاي".