بالصور| في "يوم اللاحمية" العالمي: "حب نفسك وخس عشان صحتك مش شكلك"
أيه سعيد
"أن تحب نفسك وتتقبلها كما هي، مهما كان شكل جسمك وملامح وجهك ولون بشرتك"، هي أولى الخطوات الناجحة نحو السعادة والراحة النفسية في يوم "اللاحمية" العالمي، فالكثير من أصحاب الأوزان الزائدة يترددون على عيادات التخسيس والصالات الرياضية للحصول على جسم ممشوق ولتفادي الإصابة بأمراض السمنة أيضاً، ورغم ارتفاع نسبة مرضى السمنة لـ40% من البالغين حول العالم، ووقوع أمراض كثيرة بسببها إلا أن البعض اتبع موضة جديدة وهي حب النفس كما هي، والتأقلم مع الشكل مهما كان "تخين أو رفيع"، وساعدت محلات الأزياء في هذا، إذ صممت بعض دور الأزياء ملابس مخصصة لأصحاب الأوزان الزائدة، وأطلقت عليهم أصحاب "الجسم الكيرفي".
سماح عزب فتاة عشرينية من شبرا الخيمة؛ اتبعت مراراً نظام الحمية الغذائية ولكن مرضت ونصحها الدكتور بعدم تكراره حالياً والاكتفاء بالرياضة، تقول "أنا طولي 155 سم ووزني أكتر من 75 على الأقل لازم أخس 20 كيلو ولما عملت دايت تعبت وبقى يجيلي هبوط متكرر، فقررت إني أحب نفسي كده زي ما ربنا خلقني وأتأقلم على شكلي وأجيب هدوم واسعة وفي نفس الوقت شيك، وبحاول حالياً أقلل من الأكل الجاهز والبيبسي عشان أضرارهم كتير".
عانت هالة مشعل، 21 سنة من قلة معدل الحرق فكلما اتبعت حمية غذائية أصيبت بالإحباط وتوقفت عنه بعد الذهاب لأكثر من طبيب في منطقتها بحي الزيتون، وتؤكد "أنا طولي 168 سم ووزني أكتر من 100، فكرت أعمل دايت كتير وتقريباً بعمله بمعدل شهرين كل سنة وأوقفه، كل ما أعمل دايت وزني يبدأ يقل بس بمعدل بسيط وبعد شهرين معدل الحرق يقل فأوقفه، وأنا بحب نفسي كده ومتأقلمة عليا كده جداً بس أوقات في المواصلات أو في المترو بسمع تعليقات تدايق عن وزني وكمان ممكن حد يعاكس بكلام يدايق، وبلبس كل الألوان اللي بحبها وعندي الطويل والقصير والضيق والواسع وبقول لكل بنت حبي نفسك الأول هتلاقي كل اللي حواليكي بيحبوكي".
أحمد محمد، أربعيني من الجيزة لم يهتم يوماً بزيادة وزنه وكان متأقلما مع الدهون الزائدة لمدة 15 عاما، ولكن بعد إصابته بالضغط العالي فكر جدياً في خسارة بعض الوزن، "أنا بحب الأكل جداً وخاصة الأكل السريع والأكل البيتي اللي بزبدة ومهتمتش أبداً بوزني".
منذ حوالي عام شعر محمد بإعياء وصعوبة في التنفس وبعد ذهابه للطبيب أدرك إصابته بزيادة الكوليسترول في الدم ودهون على الكبد فقرر خسارة بعض الكيلوجرامات "رغم إني وزني الزايد مش بيسبب ليا أي مشكلة بس اضطريت أخس عشان متعبش أكتر والدكتور اللي بتابع عنده قالي عندك يومين فري الأسبوع ده عشان يوم "اللاحمية".
"أن تحب شكلك كما هو ولكن تقرر فقد الوزن من أجل صحتك"، هذا ما اتبعته آية سعيد 21 سنة من عبده باشا، "أنا بحب شكلي جداً وبفرح لما حد يقولي يا كلبوظة أو يا بكابوظة بس قررت أخس من كام شهر عشان صحتي بس، خسيت أكتر من 25 كيلو في 6 شهور والحمدلله فرق معايا كتير في لبسي وصحتي، وخطيبي عمره ما كلمني عن جسمي أو قالي خسي هو بيحبني زي ما أنا".