حارس الأهلي عن والده الراحل: غبي اللي قال إن الوقت بينسي.. صبرنا يا رب

وجّه الكابتن أحمد عادل عبدالمنعم حارس مرمى النادي الأهلي، بعض الكلمات الرقيقة لوالده الراحل الكابتن عادل عبدالمنعم، حارس مرمى النادي الأهلي، قائلا: "لما بيموت حد غالي على قلبك وبتفوق من الصدمة الأولى، إنك خلاص مش هتشوفه تاني، بتحب تتكلم عليه وتحكي مع الناس عنه كتير جدا جدا، وعن تفاصيله المهمة جدا بالنسبة ليك".

وأضاف أحمد، عبر حسابه على "إنستجرام": "شويه تضحك وانت بتحكي عنه في موقف كنتوا فيها سوا وفرحانين، وفي نص الضحكة عينك تدمع عشان افتكرت إنه خلاص حاليا مش باقي منه غير روحه الغير مرئية، اللي بتلف حوليك طول ما انت فاكره، وشويه تبكي بحرقة إنه سابك لوحدك، مهما كان حوليك العالم كله هتفضل حاسس بغربة من غيره".

وتابع "حارس الأهلي": "دورك كمستمع لإنسان فقد حد إنك تسمعه وانت ساكت، تبتسم معاه وقت ما يبتسم، وإنك تتقبل لحظة ضعفه اللي بتنقله من ضحكة عالية لدموع غزيرة مسبباله وجع في القلب، وماتقولش عليه اتجنن".

وزاد أحمد: "غبي اللي قالك إن العمر بينسي، إحنا طول ما إحنا عايشين وفاكرينهم قلوبنا وعقولنا بترفض نسيانهم، كل يوم بنهون على نفسنا أننا قربنا، يمكن الدور اللي جاي يبقى علينا إحنا، ونقابلهم ونخلص من وجع فراقهم، يا رب صبر كل إنسان فقد روحه بعد موت أغلى إنسان عنده، يا رب لا تحرمنا رؤيتهم في منامنا وارض عنا وأحسن ختامنا يا الله".

• حارس مرمى
• حارس مرمى