مفيش «فوتو سيشن».. يبقى مفيش جواز

08:38 م | السبت 13 مايو 2017

أيام قليلة ويبدأ العد التنازلى لـ«موسم الأفراح»، وكما جرت العادة بالخمس سنوات الأخيرة فـ«الفوتوسيشن» أصبح أهم من «الفرح» ذاته، فقد تستغنى بعض العرائس عن إقامة حفل الزفاف لكنها لا تفرط فى جلسة التصوير، فعلى الرغم من غلاء أسعار هذه الجلسات واستغلال بعض المصورين لأزمة تعويم الجنيه، فإن الواقع يقول «مفيش فوتوسيشن.. مفيش جواز».

{long_qoute_1}

«أنا بتعامل مع الطبقة المتوسطة وأسعارى فى المعقول»، كلمات بدأ بها هشام دويدار، حديثه، فهو يعلم الأزمة التى حدثت بالمجال خاصة بعد تعويم الجنيه ويحاول التخفيض بالأسعار بقدر الإمكان، فحبه للكاميرا والتصوير جعله يترك العمل بإحدى القنوات الفضائية منذ 4 سنوات ويتفرد للعمل بهذا المجال: «الناس اللى بتغلِّى فى الأسعار هما اشتروا الكاميرا والأدوات بالغالى فبيحاولوا يعوضوا، بس فعلاً أسعار الماتريال بتاع التصوير زادت جداً، أنا عندى الباكدج بتوصل لـ900 جنيه وده يعتبر رخيص بالنسبة للباقى».

يرى «هشام» أن الزبون بطبعه يفضل السعر الغالى بدون أى تفكير وهو أحد أسباب زيادة الأسعار بهذا الشكل: «أنا مش معاهم فى الزيادة لكن هقولك الزبون هو اللى بيختار يروح للغالى، بحاول أجدد فى أفكارى، وأكتر سيشن بكون مبسوط فيه الكاجوال، ده منطقة إبداعى». هواية أحمد الباجورى، وحبه للكاميرا والتصوير مهدت له الطريق لدخول المجال والإبداع به، فمنذ 3 سنوات يرى «أحمد» أن حب التصوير هو أهم أسباب نجاح المصور، ومع اقتراب الموسم الصيفى يستعد كعادته كل عام: «أنا الفوتوسيشن عندى فى المتوسط بيوصل ألف، الناس دايماً بتحبب تتصور فى الأماكن القريبة من النيل أو السخنة».

وعلى الرغم من وجود العنصر الذكورى بكثرة فى مجال التصوير، إلا أن الإناث حاولن إثبات وجودهن فيه، فبعد تخرج «روبى» فى كلية الهندسة أرادت تطوير موهبتها فى التصوير بالكثير من الكورسات، وبعد ذلك أطلقت صفحة لها على موقع «فيس بوك» لتسويق أعمالها بعنوان «روبى فوتوجرافى»: «كل ما الواحد شغله وموهبته زادت كل ما بقى مشهور، أنا لحد دلوقتى أسعارى مش غالية أوى، لكن فيه فوتوجرافر تانيين أسعارهم بتوصل لـ10 آلاف جنيه».

الأزهر بارك وجزيرة المعادى وشارع المعز وحديقة الأندلس وقصر البارون، أشهر الأماكن التى يرغب العروسان التصوير بها، بحسب ما أكده المصورون الثلاثة؛ لكثرة المناظر الطبيعية الجميلة بها.

.. وآخران اختارا التصوير بطريقة مختلفة