بالفيديو| تجار "أهلا رمضان": "مكسبنا في الحاجة جنيه والناس عايزة أرخص"
معارض "أهلا رمضان"
افتتح المهندس شريف إسماعيل، رئيس الوزراء، معرض "أهلا رمضان" بأرض المعارض بمدينة نصر، أمس الإثنين، بحضور الدكتور علي المصيلحي، وزير التموين والتجارة الداخلية، والدكتور طارق قابيل، وزير الصناعة والتجارة ، ومحافظ القاهرة، وعدد من المسؤولين ونواب البرلمان.
وشرح أحد التجار ويدعى مصطفى أن الجزء الخاص به تابع للقوات المسلحة وأنهم يبعيون اللحم البلدي الكيلو بـ75 جنيها وأن الناس تشتري منهم وتعود إليهم مرة أخرى، وأن أسعارهم مختلفة تماما عن الجزارين، ويتمنى لو يستمر المعرض دائما.
وقالت إحدى التاجرات: "إحنا بقالنا هنا 4 أيام نفتح الساعة 10 الصبح ونقفل 10 بليل، الأسعار دلوقتي متخفضة حوالي 50%، يعني مثلا في بلح هنا بنبيعه بـ20 جنيه إحنا أصلا بنبيعه بـ30 جنيه، يعني علشان الناس تشتري مننا حاجات وتستفيد بالأسعار، إحنا منزلين الأسعار جامد يعني ممكن مكسبنا يكون جنيه واحد في الحاجة".
وأكد أحد التجار أن أسعارهم تقل عن أسعار المحال بحوالي 20%، وأن هذه مساهمة منهم في حل مشكلة الأسعار، خاصة في الشهر الكريم، ولحل مشكلة المواطن المصري.
وقال تاجر آخر: "كل واحد بياخد على قد استطاعته، يعني في واحد ممكن يقول عايز كرتونة وفي واحد بيقول عايز كيس واحد، في ناس عايزة تنزل السعر أكتر يعني بدب ما السعر ناقص جنيه عايزين ينقصوا 2 جنيه، وممكن صاحب محل ياخد كرتونة، يعني ممكن أبيع بالـ3 أو 4 كراتين، ومكاني هنا أحسن بدل ما بلف على التجار وده يقولي عايز وده يقول مش عاوز وأخسر بنزين ومواصلات، بنزل في مكان أنا واقف فيه وبنزل بضاعتي وببيعها".
ويُقام المعرض على مساحة 15 ألف متر مربع، بمشاركة الشركة القابضة للصناعات الغذائية التابعة لوزارة التموين والتجارة الداخلية، والشركات التابعة لها، وما يقرب من 200 شركة عارضة من كبرى الشركات المصرية المنتجة للسلع الغذائية والمشروبات ومنتجات التنظيف، إضافة إلى جهاز الخدمة الوطنية التابع للقوات المسلحة ووزارة الزراعة التي ستشارك بمنتجاتها المتنوعة.