الكورنيش أيضاً سياحى: «الحنطور بـ80 جنيه والفلوكة 15»
الكورنيش أيضاً سياحى: «الحنطور بـ80 جنيه والفلوكة 15»
غضب حاد سيطر على ملامح الرجل، وهو يقف أمام شباك تذاكر حديقة الجزيرة، فحديث موظف الشباك بالنسبة له يخلو من المنطق: «هتدفع 5 جنيه تذكرة، ولو عايز تركب الفلوكة تدفع 15 كمان»، حسبها الرجل الصعيدى بسرعة: «يعنى 20 جنيه لكل نفر، واحنا 5، يبقى 100.. ليه؟ حرام»، قالها محتداً بصوت عالٍ جذب انتباه الجميع، ثم انصرف مصطحباً أسرته: «100 جنيه عشان أبص على النيل؟». ظن على عبدالهادى أن خروجة نيلية، مع أسرته المكونة من 3 أبناء وزوجة، لن تُكلف أكثر من 25 جنيهاً للفلوكة، وبعض التسالى والمشروبات يصطحبها معه، قبل أن يصطدم بالحقيقة، غادر «على» وأسرته. ساروا فى اتجاه كوبرى قصر النيل، ليكتشفوا أن سور الكوبرى مكتظ بمن هم مثلهم، الحالمون بفسحة النيل، والمكتفون منها بمجرد «طلة من سور الكورنيش».
«إحنا قلنا نخرج نشم شوية هوا بالليل ونفك عن نفسنا، لقينا الفلوكة سعرها صعب فاكتفينا بالوقفة على الكوبرى كده»، قالها طارق سلامة، الذى وقف مع 4 من جيرانه خرجوا معاً للتنزه، مشيراً إلى أن فكرة ركوب حنطور تحولت إلى صدمة واجهوها بالضحك: «بنقوله الركوب بكام؟ قال 80 جنيه اللفة الكبيرة و60 الصغيرة، فشكرناه وقلناله مش هنركب»، لكن «صدقى» جاره كان أكثر ما أغضبه كوب الشاى الذى اشتراه قبل دفع ثمنه: «خدت كوباية الشاى وبقوله حسابها كام بقى؟ قالى 7 جنيه ونص، شلتها من على بقى وكنت هرميها، مش فاهم إيه سر السعر ده، مع إننا على الكورنيش يعنى مش فى قهوة ولا كافيه».
