نادية هنرى: «رمضان كان بييجى فى بلكونة أمى قبل أى مكان»

10:29 م | الثلاثاء 06 يونيو 2017

«إحنا من الجيل اللى مكناش نعرف الجار ده مسيحى ولا مسلم، كنا بنتعامل مع بعض بكل محبة وترابط، اللى بيحصل اليومين دول غريب علينا.. دا رمضان كان بييجى فى بلكونة أمى قبل أى مكان.. الفانوس وقمر الدين والياميش بتكون موجودة فى بيتنا قبل أى حد». كلمات بدأت بها نادية هنرى، عضو مجلس النواب، حديثها لـ«الوطن» حول شهر رمضان فى حياة أقباط مصر.

وبنوع من الحب تتحدث النائبة عن شهر رمضان: «شهر احتفال المصريين، مسلم ومسيحى، كنا بنستناه وإحنا صغيرين علشان نشترى الفانوس، وكلنا متربيين فى وسط عائلات مسلمة، وشهر رمضان كنا بنعيشه معاهم بالضبط، الكنافة والسوبيا والعصير، لأن رمضان حدث مصرى يهم كل المصريين وليس المسلمين بمفردهم، وعمرنا ماحسينا إننا بننفصل عن المسلمين فى هذا الشهر».

وللصيام عندها مغزى آخر غير الامتناع عن الطعام: «شهر الكرم والعطاء، والبنى آدم بيصوم فيه علشان يحس بالمحتاج، وده هدف نبيل، الصوم عن تغذية الجسد يجعلنا نبدأ فى التقرب إلى الله، وهذا غذاء للروح، موائد الرحمن تملأ الشوارع والناس بتنفذ كل وصايا الله؛ إطعام الفقير والعطف على المحتاج والتضامن والتكافل، وكل هذه الأمور، فالشعب المصرى كريم ومعطاء، ويحب الله ويحب الإنسان الذى خلقه الله».

ويأتى رمضان هذا العام بعد يوم واحد من حادث المنيا الإرهابى، ما ترك بالغ الأثر فى نفوس المصريين: «أول مرة يمر علينا رمضان فى أجواء حزينة، وده تحول غريب فى الطبيعة المصرية.. أعرف إن فيه ناس بتعمل (جمعية) علشان تحوش تكلفة العزومات الرمضانية والأكل اللى هتساهم بيه فى الموائد، علشان يشاركوا فى صنع الفرحة اللى بتكون موجودة وسط الشعب المصرى».

رمضان المصرى يختلف عن أى مكان بالعالم حسب ما ترويه «نادية»: «رمضان جزء من الثقافة الشعبية للمصريين.. كنا كمسيحيين نشارك ونساهم فى رمضان بكل أنشطته قبل المسلمين، كنت عايشة فى السعودية فترة.. وكنا بنفطر عند أصحابنا ولا نأكل إلا ساعة الفطار.. إحنا اللى عملنا جو رمضانى بصفتنا مصريين فى السعودية، وإحنا ممكن نستغل الأمر فى الترويج للسياحة.