الحب على علب العصير.. عبدالرحمن: طلبتها من ربنا قبل أهلها.. ادعولي

03:07 م | السبت 17 يونيو 2017

حب شديد سيطر عليه، حاول التعبير عن عشقه لفتاة أحلامه بطرق مختلفة، كان آخرها طبع دعوة على علب العصير، ووزعها على الصائمين وقت الإفطار لينول طلبه، أسلوب جديد وفكرة مختلفة حاول أن يحصل بها "عبدالرحمن" على طلبه على أمل أن يتحقق بالدعاء.

"طالبها من ربنا قبل أهلها، وادعولي اتجوزها"، عبارات لفتت أنظار المارة الصائمين، في أثناء توزيع طعام الإفطار عليهم، كتبها عبدالرحمن سعد، على علب العصير، وقرر أن يوزعها على الناس ليجمع أكبر عدد من الدعوات له بأن يتم تيسير أمره.

الفكرة طرأت على رأس عبدالرحمن، في أثناء مروره على الطريق الدائري، وقت آذان المغرب، ويقول: "لقيت الناس بتوزع عصير، قلت عادي ما أعمل زيهم بس أطلب منهم الدعوة اللي أنا عاوزها، وأهو كله ثواب وربنا يتقبل".

"عبدالرحمن" اعتبر الفكرة مصدر سعادة إلى قلب محبوبته أيضا "كنا متفقين أنا وهي ننزل نفطر يوم مع بعض، هي لقتني عمال اشتري في حاجات، وتستغرب إيه اللي أنا بجيبه ده، لحد ما جبت العصاير، ولقتني بكتب الكلام ده على كل العلب اللي معانا، الفرحة اللي شوفتها في عنيها مش هتكفيني سنه أشرحها".

يتحدث عبدالرحمن عن بداية قصتهما التي انطلقت من أسوار كلية دار العلوم بجامعة القاهرة: "كنا مجرد صحاب وبعد سنتين صحاب هي بقت اقرب ليا من أي حد في الدنيا، أنا لسة بدرس وهي لسة بتدرس، وبشتغل أي شغلانة بتيجي قدامي، وبحوش عشان أجبلها شبكتها، أنا بنحت في أي حاجة عشان أوصلها وأهلها يوافقوا، وأعيشها في مستوى حلو إحنا وعيالنا إن شاء الله".

وعن انتشار الصورة بشكل كبير، يقول عبدالرحمن: "الناس لما شافت الصورة قالت دول أغنية، ومعاهم فلوس وكلام من ده، والحمد لله شوفت كمية دعوات كفيلة إني أفضل مبسوط 20 سنة قدام، وشكرا لكل اللي دعالي لأني حقيقي محتاج دعواتكم".