الأسعار تحرم البسطاء من شراء لوازم العيد: «اللى ما يشترى.. يتفرج»

10:38 م | الاثنين 19 يونيو 2017

تحت مظلة كبيرة وضعتها لحمايتها من حرارة الشمس بمنطقة بولاق الدكرور، تجلس «أم إبراهيم»، بائعة خضراوات، فى انتظار قدوم الزبائن، تقول بنبرة مرتفعة: «السنة دى هنجيب منين السكر بقى بـ10 جنيه والسمنة الكيلو بـ25 جنيه، ده غير الدقيق وباقى الطلبات اللى بنحتاجها، ومفيش بيع ولا شراء علشان نقدر نشترى».

وتشير السيدة الأربعينية إلى أنها كانت تقوم بعمل جميع مستلزمات العيد من كعك وبسكويت فى «بيت العائلة» مع أشقائها بكميات كبيرة، حتى تتمكن من توزيعها على جيرانها وأبنائها، إلا أن ارتفاع الأسعار أجبرها على التخلى عن تلك العادة: «قبل العيد بـ5 أيام كنا بنفرش فى بيت العيلة مع اخواتى، وكل واحدة تجيب مننا طلباتها ونعمل من كل صنف 5 كيلو علشان كل واحدة توزّع على عيالها وجيرانها»، مضيفة: «رغم أننا كنا بنتعب، لكن ده كان بالنسبة لينا فرحة العيد، وعمايل الكعك أهم من أننا نشترى لبس لعيالنا، لكن دلوقتى خلاص مانقدرش على تمنه».

وتتابع السيدة الأربعينية: «حتى كيلو الجاهز بقى غالى، ومش عارفة هاجيب لبناتى منين، ودى عادة ماقدرش أقطعها، حتى لو مش هاجيب لنفسى، لازم أجيب ليهم، لأن فيه منهم جوزها مش بيقدر يجيب ليهم وعايزة تفرّح عيالها، ده غير أنهم اتعودوا إنى يوم الوقفة أبعت لكل واحدة فيهم كرتونة فيها كل حاجة العيد».

وتوجّه «على عبدالمقصود»، سمسار، أثناء عودته من عمله إلى أحد المخابز بمنطقة الدقى لمعرفة أسعار الكعك والبسكويت، بعدما طلبت منه ابنته التى لم يتجاوز عمرها الـ10 سنوات شراء الكعك والبسكويت، لكنه فوجئ بأن الأسعار ارتفعت بشكل مبالغ فيه، إذ بلغ سعر كيلو البسكويت 60 جنيهاً والكعك بـ75 جنيهاً، حسب كلامه: «كنت متوقع أن الأسعار هتزيد، لأن كل حاجة غليت، لكن ماتوقعتش أنها هتزيد بالشكل ده، السنة اللى فاتت كنت باجيب البسكويت بـ32 جنيه والكعك بـ43 جنيه، ورغم أن الأسعار زادت، الدخل قل»، مضيفاً: «كنت عامل حسابى إنى هاشترى، وشيلت مبلغ على جنب، لكن بعد ما شوفت الأسعار صرفت نظر عن الشرا خالص».

لم يختلف الوضع كثيراً بالنسبة إلى «سعاد محمد»، موظفة، التى أكدت ارتفاع سعر الكعك والبسكويت بما لا يتناسب مع ظروفها المادية.

وتؤكد السيدة الثلاثينية أن راتبها لا يتجاوز الـ1500 جنيه، تنفق على أولادها الثلاثة، مضيفة بنبرة ساخرة: «الكعك والبسكويت بقت حاجة ترفيهية، ومش أى حد يقدر على تمنها، حتى زمان الواحد كان بيعمل حسابه ويحوش علشان يشترى كعك العيد واللبس علشان يفرّح العيال، لكن دلوقتى ما أعرفش أعمل ده».