أصالة لجمهورها: مصدومة ومقهورة.. وبستنى معاكم العدل يسود

01:10 ص | الثلاثاء 27 يونيو 2017

نشرت المطربة أصالة نصري، تعليقا مطولا عبر صفحتها الرسمية بموقع التواصل الاجتماعي "فيس بوك"، تشرح فيه حالتها بعد توقيفها لمدة يوم في مطار بيروت لحيازتها مادة الكوكايين المخدرة

وقالت أصالة في رسالتها: "على قدّ ما كانت الساعات الطويلة الماضية قاسية وصعبة، على قدّ ما فرحت بالمحبّة وبالاهتمام وبالثقة اللي غمرتوني فيها، ما تعوّدت بحياتي فسّر أو وضّح أو كون بمطرح المتّهم، مو بس لثقتي بنفسي بل لأنّي ومن عمري ست سنين وأصغر وأنا بين الناس، وكتار كتير اللي اهتمّوا فيني، وكتار كتير اللي أضافولي وعلّموني".

وأضافت: "ولا أبالغ لو قلت إنّي بحسّ بمسؤولية التعبير، حتّى فيما له بالغ الأثر على أماني وأمان عائلتي، لأنّي ضمير هالناس اللي ما بيقدر صوتهم يوصل، طبعاً مرّات بندم وبقول "شو كان بدّي بهالتعب"، بس الأكيد إنّي خلقت لكون متل ما أنا، بيروت حبيبتي وتوأمي والناس اللي فيها بتساعدني، وبتحبني أكتر بكتير من غيرهم، أنا بحسّ حالي خلقت فيها وبعشق كلّ ذرّه من ترابها".

وتابعت: "ومارح أزعل منها كتير لأنّه مالها ذنب، شكراً لكلّ اللي ساندوني وساعدوني من كبار هالدولة، اللي بيتعذبوا أكتر منّي ليضلّوا كبار، وصلت اليوم بيتي تعبانه شوي ومصدومة شوي ومقهوره شوي، بس كمان عندي أمل بالضمير، وخصوصاً لمّا قريت بعض الرسائل لمن لا تربطني بهم مودّة، ومع ذلك نفوا عنّي ما أُشيع، والحقيقة هالشي فرّحني متل ما فرحت بالكم الهائل من المحبّه والإهتمام، اللي خفّف عنّي شعور الظلم اللي مارح أتعوّد عليه".

واستكملت رسالتها: "ما في شي إسمه صحافة صفرا، بس فيه ناس صفرا بيشتغلوا صحافة، وكلامهم أنتوا ردّيتوا عليه، ومالحق يجرحني، وسؤالي إلهم "ليش لازم كون مُتّهمة وملوّثة ليكتب قلمكم عنّي؟ ممنوع كون حرّه؟ ممنوع طالب بالعدل؟ ممنوع كون بشر متل البشر اللي خلقهم الله ليكونوا جنب بعض؟"، أملي ببكرة أحلى كبير، وأملي حتّى بالضمير اللي مات يصحى، كمان ما زال موجود، وأنا كتبت لطمّنكم إنّي قدوة، ووفيّه لثقتكم ومعكم عم بستنّى العدل يسود، ومعكم عم كافح لنكون أحرار، ورح أرجع بيروت لما بتشتقلي، وتحميني قبل ما تظلمني".