قُلل «ماهر» فى خدمة أهالى درب الفرن: 17 سنة ومكملين
قُلل «ماهر» فى خدمة أهالى درب الفرن: 17 سنة ومكملين
كشك مبنى من الرخام، موجود فى شارع درب الفرن فى منطقة السيدة عائشة، ألوانه مبهجة: أخضر، برتقالى وأصفر، تسلط أشعة الشمس عليه فتزيده لمعاناً، يقف أمامه ماهر كامل ماهر، الذى بناه منذ 17 عاماً خدمة لأهالى منطقته، حيث يرص القلل بطريقة منظمة فى نواحٍ مختلفة، لتكون ماء سبيل لكل المارة من أمامه.
يشعر «ماهر» بالسعادة كلما رأى أحد المارة ممسكاً بقلة يروى بها عطشه: «فاكر من سنين طويلة، لما جيبت صنايعية ووقفت معاهم لحد ما بنينا الرخام وزيناه، ولما بدأنا نملا القلل ونرصها بالشكل الحلو والجميل ده». يحرص على ملء القلل بالمياه مرة صباحاً وأخرى مساءً، ويحكى مع المارة ضاحكاً، وهو يضعها فى أماكنها: «أنا عندى 70 سنة، اتربيت على الشرب من القلل، مياه صحية نضيفة وتعتبر شفا لأى مريض، عمرها ما تضر، أحسن من البلاستيك، وأنضف من الإزاز، والناس تحب تشرب منها».
يحرص على غسلها جيداً فى نهاية اليوم، وتغيير القلل التى تتلف أو تتعرّض للكسر: «غيّرت قلل كتير، تتدغدغ وأجيب غيرها، عادى مايهمنيش، واللى تتكسر من حد فداه طبعاً».
قام «ماهر» بتجديد الكشك الرخامى ثلاث مرات، وعندما يسأله أحدهم عن سر اهتمامه به لسنوات طويلة، يرد: «ربنا هو اللى أراد أبنيه، حاجة لوجه الله، ربنا بيعينى، فكان لازم أحافظ عليه بشكله الحلو والمنسق، وأخليه نضيف». كل ما يسعده، هو دعوة من مار: «الله يبارك لك يا حاج ماهر»، يفرح أيضاً بمشاركة بعض الجيران بقُلل كمساعدة منهم: «أهل الخير والناس الطيبة كتير بيساهموا معايا، المنطقة دى حياتى وروحى وناسها أهلى وجيرانى، عيشنا فيها أيام كنا نفتح البيوت لبعض، وكأن مفيش فرق».
