طبيب استقبل عامه الـ60 بكشوفات مجانية: كله بثوابه

08:23 م | الأحد 09 يوليو 2017

ما إن أتمَّ عامه الـ60 حتى قرر أن يكثّف من العمل الخيرى لينفعه فى آخرته، الدكتور يحيى عبدالشافى، أخصائى الروماتيزم والتأهيل، قرر فتح أبواب عيادته أمام غير القادرين يومين فى الأسبوع «اثنين وخميس» ليكون الكشف مجانياً، خاصة بعد ارتفاع أسعار الأدوية وعدم قدرة محدودى الدخل على تلقى العلاج.

«الواحد ما بقاش فاضل من عمره قد اللى راح.. وأنا الحمد لله طول الوقت بعمل لآخرتى»، كلمات «عبدالشافى» الذى يوصى كل مرضاه فى عيادة السيدة زينب، بإعلام الآخرين من غير القادرين على التوجه إلى عيادته لتلقى العلاج مجاناً من السابعة وحتى التاسعة مساء، ومع زيادة الزحام على العيادة فى ذلك التوقيت من يومى الاثنين والخميس قرر تحديد موعد آخر من الواحدة ظهراً وحتى السابعة مساء فى نفس اليومين: «الغلابة كتير، وكفاية عليهم الأدوية اللى أسعارها ارتفعت، مش هنبقى إحنا والغلاء عليهم»، يستقبل طبيب العظام داخل عيادته مواطنين من جميع المحافظات، وتكون لهم الأولوية فى الكشف حتى يستطيعوا العودة إلى محافظاتهم قبل حلول الليل: «ما ينفعش أجيبهم وأخليهم يستنوا، وراهم لسّه سكة سفر». يستقبل «عبدالشافى» أيضاً جميع المستويات: «لو فيه حد حالته المادية كويسة وجه يكشف عمرى ما أقول له لأ.. أنا بعامل ربنا»، فهو لا يحتاج إلى دعاية لعيادته، كل ما يحتاج إليه هو كسب الثواب: «ما بدوّرش على أى حاجة غير الثواب فى آخر مشوارى مع الحياة»، ومن أهم ما يميز «يحيى» هو التعامل الحسن مع المرضى حتى لا يشعرهم بالنقص: «الناس اللى بتدخل عيادتى دول فوق دماغى.. وأنا اللى بحتاج لهم مش هما اللى بيحتاجوا لى».