كشك ذكى فى محطات المترو: حط فلوس معدنية.. وخد اللى انت عايزه
«الكشك» فى محطة مترو الشهداء
تصميم مختلف، كشك صغير يعمل بنظام الماكينة الآلية والحساب بالعملات المعدنية، فكرة اقترحها 4 شباب لتنفيذها داخل محطات المترو المختلفة، وذلك لمساعدة المواطنين فى الحصول على المشروبات السريعة وبيعها لهم بنفس سعرها خارج محطات المترو دون تحقيق أى ربح إضافى: «إحنا عملنا أول كشك بيشتغل بنظام ذكى فى مصر ومستمرين فى عمل أكشاك أكتر».
تفكير الشاب العشرينى عمرو سليم وشركائه الخارج عن المألوف هو ما حفزهم للبحث عن ممول للبدء فى تنفيذ الفكرة: «إحنا لسه شباب بندرس فى كلية تجارة إنجليزى جامعة حلوان، وساهمنا بالفكرة، والتمويل كان لازم ليه ممول». فبحسب «عمرو» فإن حالة الازدحام بالمترو، خاصة بالفترة الصباحية، هى التى أوحت لهما بالفكرة: «الناس بتبقى نازلة الصبح كل واحد رايح مشواره بيكون عايز يشرب كوباية شاى أو قهوة أو نسكافيه يجرّى ريقه بباكو بسكويت، قررنا الأسعار تبقى نفس الأسعار خارج المترو من غير أى زيادة».
«الشهداء» و«العتبة» هما أول محطتى مترو نُفذت فيهما الفكرة نظراً لازدحامهما الشديد طيلة الوقت: «الفكرة بدأت من 3 أيام، والإقبال عليها كبير جداً لأن الكشك شكله جديد والناس بتحب تجرب أى حاجة جديدة وفيه ولد واقف جنب المكنة بيساعد الناس».
وبحسب «عمرو» فإن فكرة المشروع ستحل جزءاً من مشكلة البطالة بين الشباب، ففى الوقت الحالى الحل فى تنفيذ المشاريع المبتكرة: «إحنا دلوقتى القائمين على المشروع نحو 8 بخلاف الممول، 4 فى الإدارة و4 جنب الأكشاك، وهنحتاج فى الفترة الجاية شباب تانية تساعدنا بالأفكار ويشتغلوا فى الأكشاك اللى هنفتحها فى خطوط تانية»، وبحسب «عمرو» فإن السن المطلوبة للعمل تتراوح بين 18 و30 سنة.