بالفيديو| حدث في مباريات القمة.. حكاية "جزمة" الخطيب وأول ماتش للثعلب
صورة أرشيفية
يحتشد الجمهور في المدرجات وعلى المقاهي، وتعلو أصوات التشجيع، الجميع يتأهب لمتعة كروية في يوم غير عادي، يشهد قمة بين الأهلي والزمالك، وهي المباريات التي لا تخلو من الكواليس، ترصدها "الوطن" على لسان لاعبين سابقين.
- أول مباراة قمة للخطيب:
روى نجم النادي الأهلي، محمود الخطيب، ذكرى أول مباراة قمة له، في حديث تلفزيوني: "كان أول موسم ليا لعبت تحت 17 سنة، وكانت المباراة في ملعب الأهلي والفرق كان 7 نقط، حتى لو خسرناها كان الدوري هيبقى بتاعنا".
يواصل "الخطيب" حديثه:
"المهم الإدارة قالت عليا الواد دا لعيب لازم نجيب له جزمة كورة كويسة، كان أشهر واحد بيعمل جزم كورة اسمه عم مجاهد، أخد مقاسي، وكان بيعمل جزم للفريق الأول، كان جزم من تحت خشب وفيها الاستارز، وانا كنت فرحان بيها جدًا".
ويتابع: "دخلت الملعب كان فيه 40 ألف متفرج، لكن بعد 10 دقايق الزمالك جاب جون، والحمدلله كسبنا المباراة دي، لكن بعد ربع ساعة المسمار اللي في الستارز، طلع وشكني في رجليا، فجابولي كماشة، وطلعت بره أظبط الجزمة، وكملت المباراة وجبت جول، وبعدين طلعت تاني بسبب الجزمة ولما دخلت جبت جول".
- بشير التابعي:
"بيبو وبشير".. تعد الجملة الأشهر في مباريات القمة، غير أن لدى بشير التابعي مالم يحكيه من قبل من كواليس لمباراة الـ6/1 الشهيرة، فبحسب حديثه في إحدى البرامج الفضائية، قال "بشير": "الواحد بيبقى مركز ومخضوض شوية، لكن مجرد ما يبنزل المعلب بنسى الرهبة والخوف، بتنصنع نجوم، أنا لعبت مرة واحدة سوبر ضد الأهلي، واتعادلنا ولعبنا ضربات جزاء".
يضيف بشير: "الكلام اللي عايز أقوله عن مباراة الـ6/1 أن حاسبت على مشاريب مش بتاعتي خالص، خالد بيبو مكانش يلعب فرود، اتفرجت على الماتش خمسين ألف مرة، لا أسأل سوى عن كورة واحدة، تأثير المباراة ان اخدت احسن لعيب شامل ورحت منتخب مصر واحترفت بره".
- أول مباراة قمة لحازم إمام:
في أول مباراة قمة لحازم إمام، تذكر عندما كان مشجعًا في المدرج.. "أول ماتش ليا هلعب فيه أساسي في مباراة قمة، كان كل الناس نازلة خايفة، ومبتعرفش تنام، أنا كنت مبسوط جدًا أن اتحولت من مشجع للعيب، أول ما نزلت الملعب، رحت واقف في الاستاد، وقعدت أبص حواليا وبضحك على المكان اللي كنت باجي فيه دايما كمشجع، الماتش دا اتعادلنا واحد واحد، وعملت ماتش كويس وكانت بدايتي مع الزمالك"
- عادل مصطفى:
لاعب النادي الأهلي عادل مصطفى، يتذكر هو الآخر في إحدى المقابلات التلفزيونية السابقة، مباراة مع الزمالك لم ينساها بالرغم من أنه لم يشارك فيها، هي مباراة الـ6/1.
يروي "مصطفى": "أنا كنت نازل وجهزت والجون الرابع بتاع الزمالك جه، فراح أحد أفراد الجهاز الفني طبطب عليا وقالي أرجع، كنت قاعد احتياطي، والمفروض كنت هنزل نلعب بتلاتة في نص الملعب، عشان نقفل لكن أول ما جه الجون الرابع جات للكابتن جوزيه فكرة، وهو أنه يزود الأجوان".
- شريف عبدالمنعم:
يحكي شريف عبد المنعم عن مباريات القمة، فيقول: "أسهل مباراة بالنسبة للاعبي الأهلي هي مباراة الزمالك، اللعب مفتوح وكل اللعيبة تخاف تضيع سمعتها، فاكر كويس أن عديت من فرقة الزمالك، ورحت عملتها لعادل مأمور في البعيدة، كنت هتجنن لما صدها، وراحت للخطيب، الماتش كان سنة 78 والنتيجة خلصت واحد صفر".