على طريقة وردة.. كيف تحولين الـكنبة بلدي إلى أنتريه مودرن
على طريقة وردة.. كيف تحولين الـكنبة بلدي إلى أنتريه مودرن
دائما ما أحبت الإبتكار، وعشقت الاختلاف، سعت بجد لتجديد ديكور منزلها، ومع ارتفاع أسعار المنتجات والخامات، لم تجد وردة محمد أمامهها غير استغلال موهبتها وحسها الفني، في تحويل "الكنب البلدي" بمنزلها إلى انتريهات حديثة بأقل تكلفة.
ورغم عدم معرفتها بأسرار الخياطة، استطاعت "وردة"، أن تحول "الكنب البلدي" بمنزلها إلى "ركنة مودرن"، بدون مساعدة أحد، وتقول: "ما كنش عندي أي خلفية عن طريقة عمله غير إصراري إني أجدده وأغيره بنفسي وبأقل تكلفة، وكمان أنا مش خياطة كل الحكاية إني عندي مكنة صغيرة وطبعا سألت وبحثت كتير قبل ما أنفذه".
اتجهت السيدة الثلاثينية، إلى تعليم السيدات المجاورين لها هذه الإبتكارات، كما نشرت خطوات تحويل "الكنب" إلى ركنة مودرن، عبر حسابها على "فيس بوك": "أنا عاوزة كل ست بيت أو أي حد حابب يجدد أي حاجة قديمة عنده يجددها بإيده، والله الموضوع سهل جدا بس عاوز عزيمة وأنا جايبالكوا كل التفاصيل كلها لإفادة أكبر عدد من الناس".
واستكملت: "تكلفة كل حاجة هكتبهالكوا، وبعد كده مش عاوزة حد يقول أنا مش هعرف أعمل كده أنا عاوزة الكل يجدد بإيده كفاية علينا ارتفاع أسعار الخامات"، لتردف في أولى الخطوات: "أول حاجة لازم نقص رجلين الكنب علشان نركبلها الرجلين المودرن، وكمان ممكن نقصهم وما نركبش رجلين نهائي وممكن كمان نقصر الرجلين شوية وندهنهم لون بوهيه فضي أو بني حسب الذوق".
وتابعت: "الأدوات المطلوبة للشروع في تحويل (الكنب)، هي دباسة خشب وعلبة دبابيس، ومسدس شمع و15 متر قماش، وفرخ إسفنج سمك 3 سنتيمترا، و7 كيلوجرامات فايبر، وقصاقيص إسفنج، فصوص ألماظ 120 فص، 16 رجل مودرن، 12 رجلا للكنب، و4 أرجل للتربيزاة، و13 متر سوست، غرا أو كولا أو أي ماده لاصقة للزق الإسفنج بالخشب، وزجاج للترابيزة، وإبرة تنجيد وشلتة".
وأعلنت "وردة" عن تكلفة جميع الأدوات المطلوبة لتنفيذ الفكرة، قائلة: "تكلفة الكنبتين لو هتعمليهم بنفسك تقريبا أقل من 1500 جنيه للكنبتين، ولو عاوزة تعمليهم إسفنج مضغوط يبقى تضيفي تمن فرخ إسفنج، بس لو هتعملو الشلت إسفنج مضغوط يبقى تحطوا فوقه (فايبر) ضروري علشان ما يهبطش منكوا".
