جمعية موثقة عند محام: ادفع 10 جنيه كل يوم تقبض 5 آلاف بعد 5 أيام

08:01 م | الخميس 03 أغسطس 2017

«الجمعية اليومية» كانت فكرتها مساعدة المحتاجين والمديونين. نجحت ندى حسن فى أن تدشن طريقة مختلفة لفك «زنقة» الكثيرين عن طريق عمل جمعية مكونة من 100 فرد مقابل أن يدفع كل منهم 10 جنيهات يومياً: «بطاقتك وشهادة ميلادك وتوقيع ولى الأمر.. وهتدخلى الجمعية وتقبضى الدور اللى يعجبك»، تلك هى الشروط التى فرضتها «ندى» كرسوم اشتراك بالجمعية.

شعور «ندى» بحاجة غيرها من أقاربها والمحيطين بها إلى تسديد ديونهم، جعلها تصبح رائدة فى مجال الجمعيات الـ«أون لاين»: «اقترحت إننا نعمل جمعية 100 فرد والناس تستلمها كل 5 أيام 5000 جنيه.. وبسلم الفلوس لكل 2 مع بعض فى دور واحد»، ولضمان جدية المنضمين للجمعية يقومون بتوثيق دورهم بشكل رسمى لدى أحد المحامين: «لازم ده يتم عشان ضمان الثقة.. كلنا بنمضى على إقرارات إننا هنلتزم بالدفع.. ولو حد هيخرج منها فجأة مالوش أى مستحقات مالية». يبدأ قبض أول أسماء الجمعية فى العاشر من أغسطس الحالى وتنتهى الجمعية خلال 16 شهراً، على أن يتم تجديدها مرة أخرى حتى ينتفع بها المحتاجون إليها: «كل واحد فينا عنده ظروف وبيمر بوقت محتاج الفلوس.. والجمعية مش مكلفة بيخرج من يومه كله 10 جنيه.. وبياخد 5000 جنيه»، وتعتبر «ندى» أن الجمعية من أنجح الطرق لقضاء حاجة الآخرين.