«مونيكا» ضحية جروب «كيف تشقطين ذكراً»: حياتى اتدمرت
مونيكا
حياة هادئة كانت تعيشها الطالبة الجامعية مونيكا صدقى، التى تدرس فى كلية صيدلة، وتعيش حياة مثل ملايين الفتيات، حتى جاء يوم دمر حياتها وغيّرها إلى الأبد، وذلك بفعل السوشيال ميديا، عن طريق صفحة «كيف تشقطين ذكراً».
كلمات من حساب مزيف مع صورة لـ«مونيكا» فى إحدى المناسبات تمت سرقتها من على صفحتها، انتشرت كالنار فى الهشيم، بعد أن وصفت «مونيكا» بكلام مشين: «نشروا صورتى بفستان سواريه مكتوب تحتها (لازم تلبسى فستان سواريه زى كده ومفتوح من فوق وسيبى الباقى على الولاد.. الفستان ده خلانى اتخطبت يا بنات والله)». «البوست المزيف»، الذى تم وضعه على صفحة «كيف تشقطين ذكراً»، انتشر على عدد من الصفحات مع عبارات ساخرة من محتوى البوست والإساءة لصاحبة الصورة.
فقررت «مونيكا» الرد على تلك الشائعات من خلال فيديو لايف وضعته على صفحتها الشخصية على «فيس بوك»، ظهرت فيه وهى منهارة وتبكى بحرقة، وقالت: «حد أخد صورة من صورى وكتب كلام وحش جداً، حاولت أقفل الأكونت المزيف واتقفل بالفعل، لكن الشعب اللى ما بيرحمش وأخد سكرين شوت وحاطه فى كل حتة، انتو ما عندكوش رحمة، أنا واحدة حياتى بتدمر، ليه تعملوا فيا كده؟! أنا عايشة فى حالى، أنا قاعدة مش عارفة أعمل إيه، أنا مش بلوم حد لأن الجهل مفيش ذنب فيه، لكن الذنب إنى أكتب للناس اللى ناشرة البوست وأطلب منهم يشيلوه وما يرضوش بغرض تجميع أكبر عدد من اللايك والشير».
وكتب كريم هشام، صديق «مونيكا»: «موضوع الصورة انتشر لحد ما وصل لأهل (مونيكا) فى الصعيد وبره مصر كمان، سمعة بنت اتدمرت بسبب جروب أهبل وشخص مختل، وأهلها اللى نزل من الإمارات واللى نزل من الصعيد عشان يشوفوا بيجرا إيه».