طالبة جامعية تروج لمنتجاتها فى أكبر معرض مجانى: رصيف الجامعة هو الحل
«أشرقت» أثناء صنع شنطة
موهبة اكتشفتها عن طريق الصدفة، حتى تحولت إلى حرفة تعتمد عليها أشرقت إسلام، طالبة فى الفرقة الثالثة بكلية التجارة، فى توفير مصاريفها أثناء فترة الدراسة، عن طريق صنع شنط بأشكال مختلفة من «الكورشيه»: «كنت باجرب أعمل تريكو بس فشلت»، بعد رحلة طويلة من البحث عن وسيلة لتسويق منتجها تعثرت، فكل الأماكن التى طرقت أبوابها وجدتها مكلفة: «كان نفسى أفتح معرض، بس الإيجارات غالية»، حتى التسويق عبر الإنترنت لم يُرضِ طموحها: «الناس بتدخل تسأل مابتشتريش» فلم تجد أمامها سوى الجامعة لعرض الشنط على زميلاتها: «الموضة السنة دى الكورشيه»، لم تذهب إلى ورشة أو مركز تدريب: «اتعلمت بنفسى، بدأت أتفرج على فيديوهات، وأمشى على الخطوات، لحد ما اتعلمت الأساسيات، وبعدها عملت حاجات من دماغى»، طوال عام كامل كانت تحاول أن تصل إلى النتيجة المطلوبة التى تجعل منتجاتها تنال إعجاب الناس «قعدت سنة أتعلم، وكنت باعمل حاجات بايظة وأعيدها تانى، خطوة خطوة عرفت أشتغل».
تساعدها شقيقتها الكبرى «نيرة»، 28 عاماً، فى تركيب «البطانات والسوست» للشنط: «باشتغل فى البيت وهى معايا ممكن أخلص 3 شنط فى اليوم»، تتراوح أسعار الشنط من 120 وحتى 250 جنيهاً: «على حسب حجم الشنطة وشكلها والمواد اللى باستخدمها» تختار أدواتها بعناية من ألوان وخامات «فيه تيشيرتات قطن على شكل خيط، شكله شيك وخيط المكرمية وقماش واكسسوارات وغيره وباخد رأى أصحابى».
تعلمت «الكورشيه» صدفة ثم احترفت صناعته
لم تبع سوى 5 «شنط» حتى الآن «إحنا لسه فى أول أسبوع، ربنا يسهل وأقدر أبيع الباقى»، تحلم بأن تمتلك معرضاً وتصبح مشهورة «نفسى يكون عندى جاليرى أنا وأختى فى مكان كويس ويكون ليا اسم زى أى برند».