شاب صعيدى: «أنا غاندى بن غاندى.. ونفسى أزور الهند»
شاب صعيدى: «أنا غاندى بن غاندى.. ونفسى أزور الهند»
حرج بالغ يلاحقه، منذ التحاقه بالصف الأول الابتدائى، بسبب اسمه، تردده فى ذكر الاسم كان دافعاً لسخرية كثيرين منه «انت عليك تار ولا إيه؟»، ضحكات تتزايد كلما تجرأ ابن منفلوط بأسيوط وأعلن اسمه «غندى غندى أبوشناب».
{long_qoute_1}
24 عاماً والشاب يجيب عن الأسئلة نفسها «اسمى على اسم أبويا، ولحد دلوقتى باسأله ليه جدى سماك غندى، بس مابلاقيش إجابة، ولا عند أمى إجابة، وجدى مات من 25 سنة قبل ما أتولد ومفيش فرصة أسأله».. يحكى مبلط السيراميك قصة حياته، شارحاً كيفية كتابة اسمه واسم والده دون حرف الألف «كتبوا اسم أبويا غلط من غير ألف، ولما كتبوا اسمى قالوا يبقى زى أبوه»، أما أقارب «غندى» فيخمنون سبباً لتسميته: «بيقولوا لى يمكن جدك اشتغل زمان مع هنود وعجبه الاسم».
حتى حصوله على دبلوم التجارة، كان لـ«غندى» مواقف مع اسمه «اللى يقولى انت غاندى بس النسخة الصعيدى، واللى يقول يعنى الصعيد كله مفيهوش أسماء راحوا جابولك واحد من الهند! بس اسمى كان مميز، بقى يتقال فى المدرسة فصل غندى».. لم يخف الابن غضبه من الاسم الغريب «باسأل أبويا ليه عملت فيا كده، يقولى مش عاجبك يبقى اسمك على اسم أبوك؟» يخرج من النقاش دون إجابة.
«غندى» لم يكن يعلم عن «غاندى» السياسى البارز والزعيم الروحى لاستقلال الهند سوى أنه رجل حكيم «دخلت على النت وعرفت إنه راجل كويس، ونفسى أزور الهند وهناك هاقول لهم أنا غندى بن غندى».
