عم حسن يربى ابنه المعاق: «ربنا بيحبنى عشان رزقنى بمحمد»

08:17 م | الخميس 09 نوفمبر 2017

تولى رعاية ابنه الذى يعانى من تأخر ذهنى وحركى، بعد وفاة زوجته قبل 6 سنوات، كان له الأب والأم، يحضّر له الطعام ويهتم بنظافة ملابسه، يحكى له القصص والحكايات ليؤنس وحدته، لا يُفوت موعد تمرينه حتى حصل على الحزام الأسود فى رياضة الكاراتيه، سنوات لم يشتك فيها عم حسن، صاحب الـ67 عاماً، يعيش مع ابنه «محمد» فى منزله بمنطقة العجمى بالإسكندرية، رفض الزواج من أجل رعاية ابنه العشرينى، تخلى عن وظيفته كملازم فى القوات المسلحة قبل 20 عاماً رغم كفاءته.

الأب قرر أن يتفرغ لرعاية ابنه، يراقب حركته الضعيفة وحالات التشنج التى تصيبه فجأة: «فى ثوانى بكون طالع بيه على المستشفى، مابينفعش أسيبه لوحده نهائى»، يقضيان وقتهما معاً إما فى المنزل أو فى التمرين أو المستشفى لتلقى العلاج، رغم إصابته بمرض القلب إلا أن عم حسن سعيد بحاله «على قلبى زى العسل ومقتنع إن ربنا بيحبنى عشان رزقنى بمحمد».

الأب يقوم بمهام البيت كلها بمفرده ويرفض المساعدة من أحد، يغسل وينظف ويعمل دون كلل: «كل حاجة بعملها إلا الطبخ، فعلا محدش يحس بقيمة الحاجة إلا بعد ما تبعد عنه، عشان كده كل ما بكرر اللى أمه كانت بتعمله بفتكرها».