شباب «25 يناير» ينظمون وقفة احتجاجية للمطالبة بإعادة محاكمة «مبارك»

«آه يا بلد منهوبة، والكل واخدك سبوبة».. شعار تنطلق تحته وقفة احتجاجية لمجموعة من الائتلافات الثورية عقب صلاة الجمعة اليوم، رفضا لقرار إخلاء سبيل «مبارك» وذلك رغم وضعه تحت الإقامة الجبرية. غير مسموح إلا برفع صور الشهداء والهتافات ضد «مبارك» ونظامه وهتافات لشهداء «25 يناير».. شروط وضعها هيرو المصرى وصديقاه محمد العوام ورمضان جيكا، منظمو الوقفة الاحتجاجية أمام دار القضاء العالى، للمطالبة بـ«الذوق»، حسب تعبيرهم، بإعادة فتح التحقيق مع الرئيس السابق محمد حسنى مبارك، يقول «المصرى»: «إحنا شباب يناير اللى نزلنا وكان عندنا قضية ولازم نوعى الناس إنه رغم الزحمة والتوتر اللى عمله جماعة الإخوان إلا إننا مش ناسيين حق إخواتنا اللى ماتوا وهما بينادوا بالحرية من نظام أفسد الحياة السياسية لمدة 30 سنة»، «المصرى» يحذر أى منضم إلى وقفتهم من الهتاف ضد أى تيار بالرغم من رفضهم لحكم العسكر والإخوان والفلول، ويوضح ذلك قائلا: «الوقفة دى عشان مبارك ومش مسموح لأى حد ياخد الوقفة لأسبابه وأهدافه». يرحب منظمو الوقفة الثلاثة بالتنسيق مع كل التيارات الثورية التى عزمت على النزول إلى ميادين مصر للثبات على مبادئ ثورة 25 يناير، ويتابع الشاب العشرينى قائلا: «لو هننزل لوحدنا نازلين، لكن إحنا نسقنا مع مجموعة هينضموا لينا الساعة 3 العصر بعد ما يتجمعوا فى ميدان طلعت حرب»، مؤكدا ضرورة السلمية: «بنقول لكل أم شهيد مش ناسيين حق ابنك يا أمى، وهنطالب بتقديم كل من كان له يد فى سقوط دمهم على الأرض من أول شهداء يناير لجمعة الغضب لأحداث بورسعيد وغيرهم وكل من أهمل فى تأخير إجراءات التحقيقات»، مضيفا أن المطلب الأخير لهم هو فتح باب التحقيقات فى تعذيب المعتقلين قبل الثورة: «أنا كـ(هيرو) كنت واحد منهم، ولازم أجيب حقى بنفسى وحق كل صحابى فى الميدان».