حضانة تحتفل بـ«المولد النبوى»: البنات «عرايس» والأولاد «أحصنة»
المعلمة والأطفال خلال الحفل
يتمخترن تارةً، ويتمايلن بفساتينهن الواسعة يميناً ويساراً تارةً أخرى، بينما يتقدمهن عدد من الأحصنة الصغيرة التى يرتديها الأولاد الصغار، وفى الخلفية يعلو صوت الفنان محمد قنديل، بأغنية «حلاوة زمان.. عروسة حصان»، بهذه الطريقة احتفلت إحدى دور الحضانة بذكرى المولد النبوى الشريف، حيث قدم مدرس التربية الموسيقية تامر صلاح الدين، عرضاً احتفالياً شارك فيه الأطفال لتعريفهم بسيرة النبى محمد صلى الله عليه وسلم.
قرر «تامر» اتباع هذه الطريقة لتوصيل المعلومة للأطفال بصورة بسيطة، موضحاً أنه هو الذى اختار تصميمات فساتين البنات ليبدين كعرائس المولد، كذلك ماسكات الأولاد التى صممت على شكل رؤوس الأحصنة: «بانزل فى يوم أشترى القماش بنفسى، وبعدين أقعد أرسمه وأقطعه على الباترون، وأشتغل على التفصيل بالماكينة بتاعتى فى البيت، ولو ماعنديش وقت بوديه لترزى». صمم مدرس الموسيقى 4 فساتين بنفس شكل عروسة المولد التقليدية، وساعدته زوجته فى تفصيلها، التى شاركت فى العرض أيضاً كبطلة.
«الأطفال اللى شاركوا فى العرض بتتراوح أعمارهم بين 3 و5 سنين ودول خيالهم واسع جداً، لازم نحترم دماغهم مش يا دوب نقولهم إن ده مولد النبى اللى اتولد فيه الرسول وكلوا حلاوة وخلاص، التميز إننا نخليهم جزء من الحدث نفسه»، كلمات «تامر» الذى شرح لطلابه خلال الحفل سيرة النبى محمد بالتفصيل منذ مولده: «هى دى الطريقة المثالية اللى الأطفال هيستوعبوا فيها مناسبة زى دى، ومن حقهم علينا إننا نرضى فضولهم ونعرفهم التفاصيل عشان مايبقاش مولد النبى مجرد احتفال قاصر على أكل الحلاوة بس».