اجتماع عمل
هناك العديد من الجمل والكلمات التي يرددها المديرين ولا يستطيع الموظف أن يعرف المقصود بها سواء في تسليم العمل أو في أثناء الاجتماعات أو طلب مهام.
ويقدم مصطفى خليفة استشاري تطوير الأعمال، أبرز 10 جمل والمقصود منها كما يلي:
1- أنت بتحب الشغل هنا؟
ده معناها حاجه من اتنين، يا أما سؤال عادي لغرض الاطمئنان، أو لأن مديرك شايف أن تصرفاتك سلبية أو سمع من زملائك أنك مش متعاون فعايز يعرف السبب الحقيقي لده، لو أنت فعلا مش بتحب الشغل أكيد هيبان عليك في تصرفاتك.
2- أنت شايف نفسك فين كمان خمس سنين؟
ودي من الأسئلة الشهيرة وخصوصا في مقابلات العمل، ومعناه حاجتين، يا أما عملت شغل ممتاز أوي فمديرك حابب يعرف أنت نفسك تبقى إيه وعايز يساعدك في السلم الوظيفي، أو أن شغلك سيء جدا وبيسأل السؤال ده عشان يقول أنك بالأداء ده مش هتقدر توصل للمكان اللي أنت عايزه.
3- أنا مفكرتش في الموضوع ده أو في النقطة دي قبل كده.
ودي جملة إيجابيه جدا، وبتبين أنك قلت نقطة أو اتكلمت في موضوع مكنش على باله.
4- مش وحش.
احترس من الجمله دي، فهمها بيعتمد على طريقة المدير، في مديرين دايما بيسعوا للكمال ومش أي حاجة تعجبهم، في الوقت ده الجمله هتبقى كويسة لأنه طالما قال مش وحش يبقى مقبول بالنسبة له، وفي مديرين بيبقى طلباتهم عادية وبيحاولوا يعملوا شغلهم، في الحاله دي توقع أنهم يطلبوا تعديلات على شغلك عشان (مش وحش) هتبقى مش كافية، مهم أوي تفهم لغة الجسد في الجملة دي.
5- أنا عايزك تبقى عضو في الفريق.
الجمله دي غالبا بتبقى تذكير أنك محتاج تغير طريقتك في التعامل مع زملائك لأنه شاف موقف أو زملائك اشتكو منك، ممكن هنا تطلب توضيح لو فيه مشكلة معينة أو تطلب رأيه في أدائك عشان لو عنده ملحوظة يقولها لك.
6- سيب الشغل اللي مش مهم.
حتى لو هو اللي طالبه منك، وده مش كلام عكس بعضه، غالبا بيبقى المدير تحت ضغط إنجاز مهام كبيرة وشايف أن فيه أولويات وعايزك تركز في المهم.
7- أنت عارف هتتعمل إزاي؟
احترس الجملة دي ممكن تكون خطيرة جدا، لو اتقالت في مهمة جديدة أو كانت بطريقة الاستفسار يبقى المقصود منها التأكد لو محتاج مساعدة في فهم المطلوب، لكن لو في شغل أنت متعود تعمله أو مهمة صغيرة معناها أن أدائك سيئ جدا وكل مرة بتعملها بتتسبب في مشكلة خلي بالك.
8- الناس مريحة أوي.
احترس برده من الجملة دي، لو اتقالت في سياق أن الشغل مش كتير يبقى تمام، بس لو هو شغال كتير وحاسس أن محدش شايل المسؤولية معاه هيقول الجملة دي، مهم أوي أسأله لو محتاج أي مساعدة وأحاول أدعمه وأعرض عليه أني أساعده حتى لو حاجات إدارية أو بسيطة أو حتى أقعد معاه، الدعم النفسي مطلوب زي الدعم المادي.
9- أنت شايف أن ده وقت مناسب؟
وده غالبا بتتقال لما تدخل تطلب طلب أو بتسأل سؤال أو تقترح موضوع، وهنا لازم تعرف الظروف اللي حولين الموضوع أو ظروفه هو الشخصية، ممكن يكون مضغوط أو في موضوع مهم شغالين عليه، من المناسب أنك تسأل هل الوقت مناسب وتختار الوقت المناسب لعرض فكرتك أو تقديم طلبك.
10- أنا عايزك تاخد قرار في الموضوع ده؟
غالبا مديرك عايز يديك مساحة أكبر لاتخاذ القرار ويعتمد عليك، وممكن لو اتقالت في موضوع بقاله كتير مفتوح معناه أنك متأخر في اتخاذ القرار وعايزك تخلص الموضوع.
تعليقات الفيسبوك