معسكر لتدريب الأطفال على مهام الشرطة والمطافئ والإسعاف

08:09 م | الأربعاء 10 يناير 2018

إشراك الأطفال فى الأحداث وجعلهم جزءاً منها، وفقاً لما يتناسب مع أعمارهم الصغيرة، ومدى رؤيتهم للأحداث وفهمهم للمهام التى يقوم بها رجال الشرطة والإسعاف والمطافئ والقوات الخاصة، هو الهدف من المهمة، التى قرر تامر مرسى، دكتوراه برياض الأطفال، أن يقوم بها لتعليم الأطفال وتوعيتهم بالدور الذى تقوم به مختلف أجهزة ومؤسسات الدولة، لحمايتها من الإرهاب والتصدى له.

يستغل «تامر» إجازة نصف العام، فى عمل معسكرات للأطفال داخل دور الحضانة المختلفة، وإقامة عروض تعليمية لإلمامهم ببعض الوظائف المهمة بالدولة، من خلال ممارستها فى نموذج محاكاة بشكل عملى: «رجال القوات الخاصة، هدومهم سودا، ودايماً شايلين أسلحة وعلى دماغهم كشافات، والمطافى بيلبسوا نفس الشكل واللون وكمان المهندس والدكتور وغيره»، يحرص «تامر» على شراء الأقمشة بنفسه، كما يختار التصميم الخاص بكل وظيفة: «باروح للترزى وبافضل متابعه علشان تطلع الهدوم زى الأصلية بالظبط، علشان الأطفال يتعودوا على شكلها».

«الأطفال لما يتحطوا تحت مسئولية بيحبوا يكونوا قدها علشان يثبتوا لأهاليهم أنهم شطار».. حسب «تامر»، فبهذه الطريقة يحاول أن يضع الأطفال أمام متعدّد من الوظائف التى تخدم المجتمع، وتكون هدفاً نصب أعينهم طوال مراحل دراستهم: «بالنسبة لرجال الشرطة باقول لهم إن البوليس بيخدم الشعب ولو حد شاف حاجة مش صح أو حد بيسرق بيقول لبابا وماما وهما يبلغوا الشرطة، وكذلك رجال المطافى أو الإسعاف لما نسمع صوت سرينة العربية بنقول لبابا وماما علشان يوسّعوا الطريق ويشتغلوا بسرعة، وبكده هما بيشاركوا فى المجتمع، وبيكون عندهم وعى»، مؤكداً أن التدريب العملى أفضل من الشرح النظرى لأنه يجعلهم ملمين بالمهمة التى يقوم بها كل جهاز.