المرشح المحتمل «ظاظا» يكتفى ببرنامج انتخابى من ورقة واحدة.. و«علام»: «أنا مش نبت شيطانى»
مقر الهيئة الوطنية للانتخابات بشارع قصر العينى
أوضح المرشح المحتمل الدكتور عماد الدين سالم، 57 عاماً، استشارى جراحة الفم، من مواليد بنى سويف، أنه جاء للمرة الثانية من أجل الإعلان عن ترشّحه للرئاسة، قائلاً: «أنا الوحيد من ضمن المرشحين اللى معايا برنامج انتخابى، وأول قرار فى برنامجى هو مقترح للمياه بديل للسد العالى، وأتحدى الجميع بمميزات هذا المقترح، لأنه هيوفر عشرات المليارات من المياه، هذا بالإضافة إلى أن لدىَّ مقترحات لحل أزمة سد النهضة، وعندى غير كده مشروعات كتير فى البرنامج توفر مليارات الجنيهات للدولة المصرية»، حسب قوله.
وأضاف «سالم» لـ«الوطن»: «لا أؤمن بأى جماعات أو أحزاب دينية لا سلفيين ولا إخوان، وأنا ضد توجهاتهم، وعايز الشعب كله يتحد مع بعضه من غير مسميات، والنزول إلى مكاتب الشهر العقارى لعمل توكيلات تأييد لمن يريدونه من المرشحين».
وعلى الرصيف المقابل لمبنى الهيئة الوطنية للانتخابات، وقف طارق إمام علام، رافعاً صوته لجذب المارة، رغبة منه فى تعريف نفسه قائلاً: «أنا محاسب ومرشح للمرة الرابعة على رئاسة الجمهورية، وكنت عضو فى الحزب الوطنى فى يوم من الأيام، ودلوقت رئيس حزب الحرية من سنة 2004، ومفيش أى اختلاف عن الانتخابات فى الأربع مرات اللى فاتت».
وعن برنامجه الانتخابى، قال «علام»: «أنا جاى عشان أسعد الشعب المصرى، وأقضى على الجوع والفقر والمرض، ومش كلام ولا شعارات ولا أنا غاوى شهرة، وأنا محاسب وممثل ومُعد برامج، وألعب سياسة من 40 سنة، ومش نبت شيطانى»، حسب تعبيره.
وعن السياسة التى سوف يتبعها حال وصوله إلى منصب الرئيس، قال «علام»: «هحل مجلس النواب، مع مراجعة كل القوانين اللى صدرت من أيام حسنى مبارك لحد النهارده، عشان الشعب المصرى ينعم بالحرية، مع عدم تدخل الأجهزة الأمنية فى كل حاجة، وهركز كمان على محاربة أسباب الإرهاب اللى هى الفقر والجوع والبطالة، والاحتكار، والغلاء».
وأعرب المرشح المحتمل عن استيائه الشديد من «التعجيزات الكثيرة» التى يرى أنها تواجه مَن يحاول الترشح للرئاسة، ومنها عدم الظهور الإعلامى قبل الانتخابات، بالإضافة إلى سخرية بعض الناس من المرشحين المنافسين على الرئاسة قائلاً: «كل حد يترشح الناس تستهزأ بيه، ويقولوا هو مين ده أصلاً، ويتهموه بأنه عايز يبقى مشهور ويعمل شو قدام الكاميرات، لكن ده عيب، أنا عايز أخدم الشعب المصرى».
أما السيد عبدالله حسن، والشهير بـ«ظاظا»، فاكتفى بتوزيع برنامجه الانتخابى فى ورقة واحدة، رافضاً الحديث إلى وسائل الإعلام المختلفة، قائلاً: «أنا كل مرة بترشح، اللى عايز يتكلم معايا يبقى مباشر وعلى الهواء، عشان محدش يتريق علينا، ويستهزأ بينا».