بريد الوطن| أفكار جديدة لتطوير التوك توك
التوك توك _ صورة أرشيفية
طبعاً كلنا بنشتكى من التوك توك عشان بيسبب مشاكل كتير، أقلها مشاكل المرور، وآخرها السرقة والتحرش والخطف، ومع ذلك التوك توك له فوايد ومش هنقدر نستغنى عنه. طيب مفيش حل نقدر نمنع أو على الأقل نقلل الجرايم اللى بتتم بواسطة التوك توك؟ ببساطة، نسبة كبيرة من التكاتك مالهاش نمر، ولا تراخيص، يعنى سهل الهروب به من أى جريمة بعد ارتكابها.. الفكرة بسيطة وسهلة التنفيذ من وجهة نظرى، لأنها ببساطة نفس فكرة «أوبر وكريم»، بس بالعكس، هنا الراكب هيستخدم التطبيق فى التعرف على السائق بس، يعنى يتأكد إن السائق ده كويس مش حرامى أو مجرم، أولاً هتكون فيه جهة هتدى التوك توك رقم من غير أى تعقيدات أو التزامات أو ضرايب أو مصاريف إدارية، الالتزام الوحيد أن يكون السائق اللى هيركب التوك توك ده له سيرة حسنة وسلوك طبعاً، طيب الرقم ده ممكن حتى يكون استيكر يتلزق على التوك توك، ثانياً: هيبقى فيه شوية معلومات شخصية أمنية بسيطة جداً عن السواقين، وطبعاً صور شخصية لهم، ثالثاً: هيكون فيه زى برنامج أو تطبيق بسيط جداً مرتبط بالإنترنت، ويتحمل على الموبايلات أو حتى مش لازم إنترنت، ممكن excel sheet، لكل حى من أحياء كل محافظة مثلاً، رابعاً: يبقى أى بنت أو راجل عايز يركب توك توك يقدر فى ثوانى يكتب رقم التوك توك على موبايله، ويطلع له صور السائق المحترم، مش كده يكون فيه أمان أكتر؟ ويا ريت يكون فيه نوع من الـrating، أو الثناء أو الشكاوى.
المهم بقى فى الموضوع ده إنه هيساعد السواقين المحترمين عشان الناس هتفضّل تركب مع التوك توك اللى ليه رقم وهيحد أو هيطرد السواقين غير المحترمين، لأن الناس هتتجاهلهم. يا ريت بقى الموضوع ده يتنفذ على كل وسائل المواصلات، يبقى كده بنخدم الناس وبنزود أمنهم.
محمد- مواطن
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com