محل نظارات: إذا كنت لا تملك المال.. فاطلب بالمجان
صورة أرشيفية
شعوره بالبسطاء، وسماعه حكاياتهم عن الغلاء والأسعار المرتفعة، جعل محمد سعد، صاحب محل نظارات فى شارع صفية زغلول بمحطة الرمل بالإسكندرية، يفكر فى كيفية مساعدتهم من خلال عمله، فقرّر التبرّع بنظارة مجاناً لكل من هو غير قادر على الشراء.
علق «سعد» لافتة على باب محله، كتب عليها «إن كنت لا تملك المال.. لا تخجل فى أن تطلب نظارة.. هذا حقك، وهذا واجبى.. فالله فى عون العبد ما دام العبد فى عون أخيه»، كلمات لفتت انتباه المارة، ليُؤكد لهم «سعد» صاحب الـ62 عاماً: «مش شرط أسِد جوع غلبان علشان أتصدق، أو أبقى صاحب إحساس بالغلابة.. لو كل واحد عمل الخير من خلال مهنته هنغطى كل احتياجات الفقراء.. الخير مش بس فى إننا نملا بطونهم». يتّخذ الرجل الستينى شعاراً له، وهو «محمد سعد شعار معروف.. يخلى اللى مابيشوفش يشوف»، ويرى أن مساعدة البسطاء حق عليه فى ظل ارتفاع الأسعار: «لازم كلنا نقف جنب بعض، ولو كل صاحب عمل فكّر بنفس الطريقة، الدنيا هتبقى أحسن بكتير». وسيلة «سعد» لمساعدة الغلابة يراها أهم كثيراً من الإنفاق على موائد الرحمن وكراتين السكر والزيت والسمن: «لو كل واحد أخرج الصدقة من أصل عمله لوجه الله رأفة برجل مسن أو سيدة عجوز أو شباب غير قادر، أو طفل يتيم، محدش هيبقى محتاج».