«آية» مابتتكسفش من شغلها: نقاشة وأفتخر

09:16 م | الأربعاء 07 فبراير 2018

فنانة من طراز مختلف، ترسم دون أن تمسك بالورقة والألوان، أدواتها بوية وفرشة ورول، تحول الجدران إلى لوحات تكاد تنطق بما تحتويه من رسومات وأمثال شعبية وأقوال مأثورة، هى آية الله رمضان، 23 عاماً، تخرجت فى كلية الفنون التطبيقية، لكنها وجدت فى النقاشة العمل الأقرب إليها.

«النقاشة مش مجرد شغل بالنسبة لى، ده فن باخرج فيه كل طاقتى، باقدر أعبر به عن اللى جوايا بطريقتى، عمرى ما اتكسف إنى باشتغل نقاشة».. كلمات «آية» التى تُردّدها طوال الوقت على مسامع من يندهشون من عملها كنقاشة: «أنا باعمل اللى مابيعملوش النقاشين، بارسم 3D، وممكن أرسم أشكال لمناظر وفنانين ومشاهير». لم تعمل «آية» بمؤهلها وإنما قرّرت أن تُبرز مجال دراستها فوق الجدران: «عشقى للرسم خلانى أطور من نفسى طول الوقت، وأقدم الجديد، فى المهنة دى، وطبعاً فيه نقاشين بيستفيدوا منى وحابين يتعلموا بعض الرسومات علشان يقدموا جديد للناس فى شغلهم».

اعتادت «آية» على الذهاب إلى قصر الثقافة وتعليم الرسم، لكى تنمى مهاراتها: «كنت باروح قصر الثقافة علشان أتعلم رسم بطرق مختلفة وأتعرف على حاجات جديدة فيه أكتر ممكن أكون ماتعلمتهاش قبل كده». وتعتبر والدتها، من أوائل الداعمين لها فى مشوارها: «كانت معترضة فى البداية على، بس لما لاقتنى ناجحة وباعمل اللى عايزاه والناس كلها شهدت على تميزى فى مجال النقاشة، بقيت تدعمنى أكتر». بدأت «آية» عملها من خلال السوشيال ميديا ومواقع التواصل الاجتماعى: «بيجى لى الشغل عن طريق فيس بوك ومبسوطة بده جداً». تعمل مع شقيقتها وصديقتها كفريق عمل واحد، متحديات كل الأزمات والصعوبات التى تواجههن، من خلال دعم بعضهن لبعض.