سرقة وتحرش وقتل.. جرائم التسوق الإلكترونى: «بيع اللى عايزه.. واشترى عمرك»
صورة أرشيفية
لم تقتصر الجرائم الناتجة عن البيع والشراء إلكترونياً على التحرش والنصب والسرقة، فجرائم التسوق الإلكترونى وصلت إلى القتل بعد الحادثة التى تعرض لها طالب بكلية الهندسة، الذى توجه فى الموعد المتفق عليه لشراء «لاب توب» من شابين وبحوزته 25 ألف جنيه، ليروح ضحية السرقة، حيث حصلا منه على المبلغ الذى بحوزته وقتلاه بالأسلحة البيضاء وفرّا هاربين.
«ابنى متعود يبيع ويشترى على الإنترنت أى حاجة، باعتبار إن الحاجة قدامه وسهلة بدل ما ينزل يلف على محلات، فقال أنا هشوف لاب توب عشان الجامعة رغم إنى حذرته كتير من البيع الإلكترونى ده لأنه بيتعامل مع ناس مايعرفهاش».. كلمات والد الشاب الراحل محمد عبدالعزيز، الذى حصل على مبلغ اللاب توب من والدته ورحل قبل أن يحقق حلمه فى اقتنائه: «أمه باعت دهبها عشان تحقق له أمنيته اللاب توب اللى نفسه يجيبه، هو قبل كده كان بيجيب حاجات بسيطة من مصروفه الشخصى».
بعد الموقف الأخير لصديق الطفولة، قرر حسن عبدالعليم، عدم التعامل إلكترونياً فى البيع أو الشراء: «اللى استغربته إن محمد كان بيقولى فى كل مرة بينزل يشترى أو بيعرض حاجة على النت، المرة دى ماقاليش أبداً»، كان «حسن» يشجعه بالشراء من على الإنترنت باعتبار أن المعروض أقل ثمناً من المحلات: «ماكناش بنسمع عن أى جرايم من دى، فماكانش مخون، بس اللى طور الأمور للقتل إن محمد معاه الحزام البنى فى الكاراتيه وماحبش يستسلم وقاومهم وهما مسلحين للأسف».
شريفة أحمد، من مستخدمى مواقع البيع الإلكترونى، تعرضت من قبل لحادث سرقة لكنها نجت منه: «بقالى سنة ونص باستخدم الإنترنت عشان أبيع عليه وأنا قاعدة فى البيت، وفى يوم واحدة كلمتنى وقالتلى إنى لازم أقابلها عند الدائرى وتستلم الحاجة، ولما قلتلها أبعتلك مندوب مارضيتش، لما رُحت حاولت تسرقنى بس صرخت والناس لحقونى».. بحسب «شريفة» التى غيرت طريقة تعاملها مع مستخدمى الإنترنت، وأصبحت تتعامل عن طريق إحدى شركات الشحن للتوصيل.
من جهة أخرى، قررت إدارة موقع أوليكس، بعد انتشار حوادث النصب والسرقة باسم الموقع، استقبال البائعين والمشترين عن طريق الموقع داخل أحد الفروع الثلاثة «المعادى، مدينة نصر، الإسكندرية»، وبحسب أحمد عارف، مسئول إحدى الشركات الخاصة لبيع الإلكترونيات: «دى أأمن طريقة للناس عشان يقدروا يتعاملوا مع بعض من غير خوف».. مؤكداً أنه تبرع بتخصيص مكان للمقابلة بين المستخدمين لسلامتهم الشخصية.