سكان التجمع يحتفلون بالانتخابات الرئاسية بالبلالين والأعلام

02:30 م | الاثنين 26 مارس 2018

على أنغام أغنية "قالوا إيه" لجنود الصاعقة، والأغاني الوطنية، وقفوا أغلب سكان "التجمع الخامس" أمام المقار الانتخابية للإدلاء بأصواتهم، ممسكين في ايديهم بلالين وعلم مصر، وآخرون يوزعون "آيس كريم" احتفالاً باليوم الأول في الانتخابات الرئاسية، بالإضافة لحث جيرانهم على المشاركة تحت شعار "انزلوا وشاركوا.. مصر هتفضل قد الدنيا".

طابور ممتد بطول الشادر الملون بأعلام مصر، وقفت بداخله سلمى أنور وعدد من السيدات المشاركين بالمنطقة، للتصويت في الانتخابات الرئاسية، لصالح الاستقرار والأمن واستمرار "عجلة التنمية" بحسب قولها: "انا نزلت عشان انتخب السيسي طبعاً، لأنه راجل بيشتغل اكتر ما بيتكلم، البلد كانت صعبة في كل حاجة وفي الوقت اللي كان الناس شايفه مصر ملهاش قومه قومها، والحاجة اللي بتاخد سنين عشان تتعمل عملها في سنة وفي مشاريع اتعملت في شهور، والبلد محتاجه صوتي لأنه أمانة".

شعور بالفخر، انتاب السيدة الاربعينية، لمشاركتها في الانتخابات الرئاسية، دفعها لشراء مجموعة من البلالين بألوان مبهجة وتوزيعها على المشاركين بالطابور: "الناس كانت مبسوطة جداً، وانا كنت اول واحدة في الطابور اول ما اللجنة فتحت، ووزعت البلالين على الكبير والصغير وكله كان بياخد مني وفرحانين باللي البلد باقت فيه والخير اللي بقى فيها".

فرحة "سلمى" لا تختلف كثيراً عن سيدة السندي، التي شاركت ايضاً في الانتخابات الرئاسية بنفس الطابور بالتجمع الخامس، مقرره توزيع ايس كريم على المشاركين، تعبيراً عن فرحتها: "فكرت اوزع على الناس حاجة بيحبوها، واحفذ الناس بطريقتي على الوقفة والانتظار، وافرح معاهم لأن الانتخابات دي مش كل يوم بتتعمل وده واجب عليا عشان مصر"، مضيفه: "انا لو عليا بتمنى السيسي يفضل ينزل وانا انتخبه لأنه راجل يستاهل، وبيحب البلد، ومحتاجين زيه كتير عشان البلد تبقى احسن وتفضل بخير زي ما هو خلاها كويسه ومبيضحكش علينا".