معرض كتب لتشجيع أهالى أسيوط على القراءة: «بجنيه وبس.. وتعالى بص»

09:14 م | الأحد 01 أبريل 2018

تعتبر محافظات الصعيد من أكثر المحافظات المتعطشة لإقامة معارض للكتب، وهو ما دفع دار «عصير الكتب» للطبع والنشر إلى إقامة معرض لبيع الكتب الحديثة التى صدرت بين عامى 2017، 2018 وذلك فى الفترة من 30 مارس وحتى 31 أبريل، مقابل جنيه واحد فقط للكتاب، لتشجيع الناس على القراءة ونشر الثقافة بين أهالى الصعيد، الذين يجدون صعوبة فى الحصول على الكتب التى يريدونها.

«نازلين بـ1000 كتاب كلها طبعة حديثة وتابعة للدار»، بحسب هشام جمال، المسئول عن المعرض المقام فى قصر الثقافة بأسيوط، وتقدم الدار عروض تخفيض أخرى، تتراوح بين 20% و60% على مختلف الكتب: «عندنا الكتب القديمة بنبيعها بأسعار مخفضة جداً». على الرغم من أن ذلك من الممكن أن يعرض الدار إلى بعض الخسارة، إلا أنهم مهمومون بتشجيع أهالى الصعيد على القراءة والاطلاع: «كل اللى بنفكر فيه أن يكون أهالى الصعيد بيقروا وبيوصل لهم كل الكتب، إحنا كمان هنعمل معارض فى باقى محافظات الصعيد على فترات مختلفة». وبدأت الدار فى بيع الكتب بجنيه من محافظة أسيوط، نظراً لأن القائمين على الدار ينتمون إلى المحافظة: «بلدنا كان ليها الفضل علينا.. فى الأول نقدر نعمل الدار فبدأنا بيها وهنكمل لباقى المحافظات». يستمر عمل المعرض من 10 صباحاً وحتى 10 مساءً: «بنساعد الناس اللى لسه أول مرة تقرأ ونفسها يبقى عندها مكتبة وبتستغل وجود المعرض عندها، وبنرشح لهم مجموعة كتب فى الأول تقدر تفيدهم وتحببهم فى القراءة». ويساعد «هشام» القراء على تنظيم وتقسيم أوقاتهم حتى يستمروا فى القراءة ولا ينشغلوا عنها: «بنحط للناس خطط للوقت عشان يستمروا، مايبقاش مجرد ما الكتب خلصت يبطلوا قراءة».