حسام غنيم يكتب: فيها حاجة حلوة منها منابع الخير
حسام غنيم
فيها حاجة حلوة، كفر الشيخ محافظة عظيمة وعريقة ومن المحافظات الفريدة من نوعها مش بس فى تاريخها أو حضارتها، لكن فى ناسها وأهلها يمكن الكل يحكم عليها بأنها مجتمع زراعى وفقط، ولكنها محافظة زراعية، صناعية، تجارية، سياحية، متفردة بموقعها على شاطئ البحر المتوسط ونهر النيل، فيها كنوز بترول وغاز وأسماك وأرز ونخيل حتى رملتها السودة كنوز، ولادها وعلماؤها جعلوها محافظة الأمل والمستقبل، بكرة أحسن، بكرة أجمل، بكرة كل الخير لبلادنا، بكرة كل الخير لولادنا، تحيا مصر بأهلها بجيشها بعلمها، فرحانة ورافعة راسها أمام الدنيا كلها، كفر الشيخ مش فيها حاجة واحدة حلوة، دى فيها حاجات كتير، فيها الكنيسة والجامع ومنها منابع الخير.
كفر الشيخ مش بس مجرد اسم فى شوية ورق، لا دى حضارة وتاريخ وخرّجت علماء فى شتى المجالات، بقى العالم كله بيتحاكى بيها وبسمكها وسياحتها وآثارها، فيها الخير والمحبة والسلام، شيوخها مع قساوسها فى كل مكان وكل المناسبات، هنقول إيه ولا إيه عن كفر الشيخ، هنقول إنها بلد الأولياء الصالحين، العلم والعلماء والطب، الأمن والأمان والطيبة والكرم، أهلها ناس طيبين، طبيعتهم بتعكس التسامح والتواضع، من الفجرية كل واحد بيسعى على رزقه ولأجل كسب قوت يومه وتوفير حياة كريمة لولاده، الصياد بيتوكل على الله وبيرمى شباكه علشان يرجع بشوية سمك لأجل زوجته وولاده، الفلاح بيحرث فى أرضه لأجل تخضر وتطلع خيرها.
فيها حاجة حلوة، فيها مستشفى كبير على مستوى عالمى، فيها تل أكبر فيه آثار فرعونية، وهيبقى مزار لكل فئات الشعب، وفيها مدينة كاملة أثرية إسلامية، التالتة على مستوى الجمهورية والرابعة عالمياً من حيث عدد الآثار الإسلامية، فيها مصيف بيجمع كل الطبقات والعائلات، فيها مزارع أسماك منتشرة بطولها وعرضها لتحقيق الاكتفاء الذاتى من البروتين وكمان يكفى التصدير، فيها غاز وحقول وآبار هتكون سبب فى تقليل استيراد مصر، فيها أكبر محطة لتوليد الكهرباء بيتحاكى بيها الأجانب، نقول إيه ولا إيه نقول للى ماشافش كفر الشيخ، تعالى شوف محافظتنا، وأنا بقول للشباب، على كل شاب من أبناء المحافظة التمسك بالقيم والأخلاق التى تربى عليها، كما أن هناك قيمة اسمها قيمة العمل التى تحقق للإنسان آماله وطموحاته، فعلى أرض هذا الوطن نشأنا وأكلنا من خيراته، وفيه عاش الأجداد وعلى الأحفاد المحافظة عليه، حقق الله لكل شاب طموحاته وأحلامه.
عضو هيئة التدريس بكلية الآداب جامعة المنوفية