«سهر» تساعد الأطفال بالرسم: «باعلمهم فى المستشفيات.. وأرسمهم فى الشارع»

11:10 م | الجمعة 18 مايو 2018

حلمها الوحيد هو إسعاد كل طفل مريض أو شريد فى الشارع، فتقوم بتنظيم زيارات لمستشفيات الأطفال ودور رعاية الأيتام، وتحمل معها أدوات الرسم، لعمل ورش رسم وتلوين لمعالجة الأطفال بالفن، تدخل البهجة والسرور على قلوبهم الصغيرة التى أنهكتها آلام المرض.

سهر بدر، 27 عاماً، تخرجت فى كلية الخدمة الاجتماعية، لكن عشقها للرسم دفعها لدراسته بشكل حر بقسم التصوير فى كلية الفنون التطبيقية بالزمالك، كما اجتازت بعض ورش العلاج بالفن، لمساعدة الأطفال: «بيخفف عنهم الوجع شوية، خاصة فى الفترة اللى مركزين فيها على تعلم الرسم، كمان بيحفز بعض الأطفال إنهم يعملوا ده فى وقت فراغهم».

لا تنسى «سهر» أطفال الشوارع، فتتعمد الجلوس فى عرض الشارع لاستقطاب الأطفال حولها، وترسم لوحات أمامهم لتشجيعهم على استثمار الوقت الذى يقضونه فى الشارع بشكل إيجابى، سواء فى الرسم أو أى موهبة أخرى.

من بين الزيارات التى قامت بها «سهر» مستشفى 57357 للأطفال، ومعهد مجدى يعقوب للقلب، وكذلك بعض دور الأيتام فى محافظات الإسكندرية، دمنهور، أسوان: «فى القاهرة باروح المركز الثقافى عشان أعلم الأطفال الرسم، والمركز كتير يساعدنى ويمدنى بتذاكر قطار للسفر من محافظة للتانية ومساعدة الأطفال».

خبرة «سهر» فى التعامل مع الأطفال تمكنها من مساعدتهم خلال ورش الرسم: «الطفل بيحب يكون هو القائد، ويرسم بنفسه اللى اتعلمه، ودى أكتر حاجة بتفرحهم، وباقعد معاهم من ساعتين لـ3 ساعات، عشان أهتم بكل طفل، وأديله نفس قدر الاهتمام والوقت ومايتضايقش».