«ندى»: خسيت ١٣ كيلو علشان «بالحجم العائلى»
ندى موسى
أعربت الفنانة الشابة ندى موسى عن سعادتها بالمشاركة مع الفنان القدير يحيى الفخرانى فى مسلسل «بالحجم العائلى»، وقالت فى تصريحات خاصة لـ«الوطن»: «تجربة ممتعة جداً، سعيدة بكل مشهد بيجمعنى بالدكتور يحيى، لأنه ممثل قدير، اللى بيشتغل قدّامه بيحس أن عينه نفسها بتتكلم وبياخدك لعالم تانى خالص ويجبرك إنك تقدم أحسن ما عندك فى المشهد».
وحسب «ندى» فإنها تشرفت أيضاً بالعمل مع المخرجة هالة خليل والكاتب محمد رجاء، الذى وصفته بالسيناريست الشاطر: «أعماله فيها فلفل وشطة، لأنه عارف بيعمل إيه وبيكتب إيه».
وعن الاستعدادات التى سبقت مشاركتها فى المسلسل قالت: «فى مسلسل (حكاية بنات) كان مطلوب أن وزنى يبقى زايد، وفى مسلسل (بالحجم العائلى) باجسد دور مدربة زومبا، يعنى لازم يبقى جسمى رشيق جداً عشان كده خسيت 13 كيلو فى 3 شهور ودلوقتى باحاول أحافظ على وزنى رغم إغراءات الكنافة والحلويات من يوم ما بدأ رمضان».
وتابعت: «قضينا 3 شهور مع بعض بنصور المسلسل فى مرسى علم وكنا بعيدين عن أهالينا، وده خلانا كلنا عائلة واحدة وأصحاب بجد، دلوقتى تقريباً فاضل لى 20% بس من مشاهدى».
وأكدت «ندى» سعادتها بردود الفعل على المسلسل وعلى شخصية «رشا» التى تجسدها: «أنا باعمل كل اللى عليا علشان أقدم حاجة تسيب علامة كويسة عند الجمهور، ويا رب أكون قد المسئولية الكبيرة دى فى التمثيل مع نجم كبير بحجم يحيى الفخرانى، خصوصاً أن هو اللى اختارنى للدور ده».