اللغة الكورية تغير حياة «ريهام»: الحمد لله إنى مادخلتش صيدلة

10:29 م | الأربعاء 30 مايو 2018

مجموعها فى الثانوية العامة 97% خيب آمالها فى الالتحاق بكلية الصيدلة، فقررت أن تتحدى نفسها والجميع، وتلتحق بكلية الألسن جامعة عين شمس قسم كورى مجرى، واحتملت مشقة الانتقال من محافظتها الإسكندرية لتعيش فى القاهرة، وتدرس الأدب والشعر والتاريخ والجغرافيا والموسيقى.

ريهام الشرقاوى، ترى أن نتيجة تنسيق الثانوية العامة ليست النهاية: «ألسن عين شمس كانت الرغبة الـ48 والأخيرة ليّا، ولما جاتلى اكتأبت وزعلت وقررت آخد الريسك وأنقل للإقامة فى القاهرة لوحدى، ودى كانت أحسن حاجة حصلت ليا، ومن أول سنة اشتغلت، كنت بدّرس عربى للكوريين وكورى لغير الكوريين، وفى سنة تانية سافرت منحة للمجر، وفى تالتة منحة لكوريا، وسنة رابعة منحة للمجر لمدة سنة، وسافرت كمان ١٥ دولة لوحدى، ولو كنت دخلت صيدلة ما كنتش رحت فى أى مكان».

قسم الكورى المجرى كان فاتحة خير لـ«ريهام»، فمن خلاله عملت فى مهن مختلفة وتقلدت مناصب عديدة: «اشتغلت فى شركة بترول كورية، واتطوعت أكون مرافقة ومترجمة لفريق كورى فى بطولة العالم للتايكوندو فى شرم الشيخ ٢٠١٧، وكنت واحدة من الناس اللى بيذيعوا بطولة أفريقيا للكرة الطائرة ٢٠١٧، وحالياً أنا مترجمة فورية فى مصنع». تعرفت «ريهام» على ثقافات مختلفة، فاللغة الكورية أطلعتها على الثقافة الآسيوية، واللغة المجرية عرفتها بالثقافة الأوروبية، وهما مختلفتان تماماً عن بعض وعن ثقافتنا الأفريقية: «بقى ليّا أصحاب من بلاد كتيرة».

نصيحة «ريهام» لطلاب الثانوية العامة قبل بدء الامتحانات: «الثانوية العامة مش نهاية الحياة، ولا نتيجتها تعنى الحكم بالموت، أياً كانت نتيجتك ممكن تكون سبب يغير حياتك للأفضل بنسبة ١٨٠ درجة، لازم تعافر وتتعب وتتعلم».