مسحراتي اليوم الثامن عشر
صورة أرشيفية
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحتة من بلدى حتة من كبدى حتة من موال
أنا كنت فلاح وكان محراتى آه ورا آه
وكنت عامل ما حدش قدره ورآه
وكنت شاعر تئن أقلامى يا ورقاه
دلوقتى صوتى فرايحى فى العزيق والحرت
طبلت أنا وسحرت
قبّلت أنا وبحّرت
وصبحت أنا مسحراتى سمع الدنيا
ودب مطرح ما حب وكلمته العليا
يمن فجر يوليه اللى شافه وطيبه ورقاه
نده عليكى كأن الدنيا نادهالك
قولة يا ليلى ليالى العمر قادهالك
يا عينى بالمواويل الحمر قادهالك
غنى الأمل والشهامة والفرح والنصر
ولولاكى يا مصر كان قلبه رقد هالك
اصحى يا نايم وحد الدايم
السعى للصوم خير من النوم
دى ليالى سمحة نجومها سبحة
اصحى يا نايم يا نايم اصحى
وحد الرزاق