لبس العيد من على الرصيف: بلاها جودة.. المهم السعر
يوسف سيد مع أحد أصدقائه بعد شراء ملابس العيد من رصيف السيدة عائشة
ارتفاع أسعار الملابس دفع مواطنين من شرائح اجتماعية مختلفة إلى تغيير وجهتهم فى شراء لبس العيد، فاعتزلوا المحال التجارية والـ«مولات» الشهيرة ذات الأسعار المرتفعة، وقصدوا الأسواق الشعبية التى تتفق مع ما فى جيوبهم.
أصوات الباعة تعلو فى السيدة عائشة، أحدهم يُردد: «تى شيرت مستورد بـ130 جنيه»، وآخر يجذب الزبائن، ويقول: «إلحق التصفية، أى حاجة بـ15 جنيه.. تعالى قرّب، لبس العيد عندنا»، الهتافات التى جذبت يوسف سيد، القادم من القليوبية، للبحث عن ملابس بأسعار مخفّضة للمرة الأولى: «ناس كتير قررت الشراء من الشارع، أصل الحاجة اللى بـ200 جنيه فى المحل هنا سعرها 100». بعد فرز «يوسف»، لملابس الرصيف، لاحظ أن شكل الـ«موديلات» متقارب من الموجود فى المحال التجارية، لكن بجودة أقل: «بعدت عن المستعمل، وركزت فى الجديد، واشتريت كوتشى كنت شايفه فى محل بـ220، ولقيته هنا بـ100 جنيه».
«يوسف»: اشتريت كوتشى من محل بـ220 جنيه لقيته فى الشارع بـ100.. و«أحمد»: ناس كتير بيشتروا مننا
بحث محمد ممدوح، الذى يبلغ من العمر 20 عاماً عن ملابس جيدة من بين المعروضة بشارع السيدة عائشة، فلأول مرة يقتنع بشراء المستعمل، وجده جيداً وبعض القطع تبدو كالجديدة: «أول مرة أنزل سوق شعبية، لقيت حاجات كويسة، اللى كنت هاجيبه من محل بـ300 جنيه، هنا لقيته بـ50، وكبيره قوى 100 جنيه».
يبيع هانى محمد، الملابس المستعملة بـ40 جنيهاً، والبنطلون الجديد بـ120 جنيهاً، ويعرضها كلها على «ستاند» حديدى وضعه على الرصيف، وبينما كان عدد من الشباب يتفحص البضاعة، أخذ يردد: «ولو هاحرق قوى وأقلل السعر، يبقى 100 جنيه آخره»، مؤكداً أن زبون الأسواق الشعبية اختلف بعض الشىء عن الماضى: «المحلات غليت مرة واتنين وتلاتة، وبقينا نشوف هنا ناس من طبقات راقية، فيه اللى بيتفرج بس وفيه اللى بيشترى». فى الأسواق الشعبية المختلفة لبيع الملابس، من المنيب إلى السيدة، يتجول أحمد محمود وابنه «إبراهيم»، لبيع بضاعتهما المتكدسة على فرشتهما، وهى أحذية لا يزيد سعر أغلاها على 25 جنيهاً: «ناس كتير كانوا بيشتروا من محلات بقوا ييجوا لنا، على قد اللى معاهم، مش عارفين يشتروا من محل، واحد معاه 3 و4 عيال، هيشترى بكام وهو بيقبض كام؟». يبيع إسلام أحمد الأحذية الحريمى المستعملة والجديدة فى الشارع، يفرشها على الرصيف ويجلس بجانبها، تتفحصها أيدى الزبائن لانتقاء أفضلها: «المحلات سعرها زيادة على ناس كتيرة، فبقوا ييجوا هنا، يلاقوا مستعمل فى حدود 25 جنيه، وجديد 90 و100، أما المحلات فأقل حاجة 200 جنيه».
إسلام بائع أحذية