5 علامات تدل على احتياجك لإجازة من العمل
5 علامات تدل على احتياجك لإجازة من العمل
أحيانا يمر على الشخص فترة يتعرض خلالها للضغط في العمل ما يؤثر عليه سواء داخل عمله أو بالخارج في حياته الطبيعية، ويجعله يشعر أنه غير قادر على استكمال مهامه بنفس المستوى المعتاد عليه والحماس والروح.
ويٌقدم مصطفى خليفة استشاري تطوير الأعمال بعض العلامات التي إذا وصل إليها الشخص لابد من طلب إجازة للراحة، كما يلي:
1. تشعر في الساعات الأولى من اليوم بالإجهاد
لما تحس بالاجهاد بدري وخصوصا لو عملت عاداتك اليومية ومازلت مجهد، زي مثلا لو متعود تشرب قهوه أو شاي الصبح وشربتهم بالفعل بس برده حاسس بإجهاد، ده معناه أنك مش بترتاح بشكل كويس اللي يخليك تعرف تكمل شغلك.
2. تشعر في منتصف اليوم أنك منتظر آخر اليوم
وده لأنك مجهد جدا فبتبقى مش مستحمل تعب الشغل وعايز اليوم يخلص بأي شكل، وده برده معناه أنك مش بتاخد احتياجك من الراحة.
3. تشعر أن الأيام متواصلة مع بعضها
لما تحس أن الايام بتدخل في بعضها وكأنها يوم طويل، واللي بتبات فيه بتصبح فيه، ده معناه أنك مبتفصلش خالص وأنك مش بتاخد راحة كافية تخلي جسمك وعقلك يعوضوا التعب ويرجعوا لحالتهم الطبيعية.
4. تجد نفسك متخبط بأيام الاسبوع
ده معناها أنك وصلت لمرحلة صعبة من تواصل الأيام ببعضها وفقدت القدرة أنك تميز بين أيام الاسبوع، لازم تلحق نفسك خصوصا لو بدأت تكتب تاريخ يومين تلاتة فاتو بدل تاريخ النهاردة.
5. تشعر أن أيام الراحة الأسبوعية غير كافية
وده معناه أن حتى الجمعه أو الجمعه والسبت مش بتحس فيهم أنك خدت احتياجك من الراحة، وبالتالي بتحس أن الأسبوعين اتصلوا ببعض وأنك ملحقتش تستريح، ده معناه يا أما اجهادك كبير والراحة دي مش مكفيه أو أنك بتعمل شغل أو مشاوير كتير حتى أيام إجازاتك فمش بتلحق تستريح.
- مهم جدا لو حسيت بالحاجات دي أنك تفصل فعلا، وتحاول تاخد الإجازة الأسبوعيه في راحة تامة، وياريت لو تزود عليها يوم تاخده إجازة عشان تحس فعلا أنك فصلت وتقدر ترجع لشغلك تاني وأنت فريش ومتتأثرش حياتك الشخصية بإجهاد الشغل.
