«اتعلمى الخياطة فى 10 أيام»: اللى أوله «تفصيل».. آخره «عيد»
سيدة تلوح بـ«تى شيرت» فصلته خلال الدورة التدريبية
أراد مواجهة الارتفاع الجنونى فى أسعار الملابس الجاهزة بالمحال التجارية، وأصر على إدخال السعادة فى نفوس الأمهات وأطفالهن، فطرح مبادرة لتعليم السيدات التفصيل بأبسط الطرق وأسهلها، رافعاً شعار «اتعلمى الخياطة فى 10 أيام ووفرى».
يوسف حسين، صاحب مشغل للخياطة والتفصيل بمحافظة أسيوط، حاول مساعدة السيدات اللاتى يعملن معه، وتعليم ربات البيوت مبادئ تفصيل ملابس الأطفال بطرق مبتكرة وبأقل التكاليف: «من حق العيال تفرح».
100 جنيه فقط هو سعر كورس التفصيل، الذى طرحه «يوسف» داخل مشغله الخاص، حيث يقوم بتوفير الخامات اللازمة لربات البيوت، التى تساعدهن على تحقيق هدفهن: «الستات زمان كانت بتفصل اللبس لعيالها، وكان قليل اللى بيشترى جاهز. عاوزين نرجع الثقافة دى تانى، خاصة أن كان كل واحد ليه تاتش مختلف فى لبسه بيميزه عن أى حد تانى».
70% هى نسبة مشاركة السيدات فى مبادرة تعلم التفصيل، حسب «يوسف» مع اقتراب انتهاء شهر رمضان: «ماكنتش متوقع أن الستات فعلاً عاوزة تتعلم وتوفر بالشكل ده»، مشيراً إلى مبادئ متنوعة تعلمتها ربات البيوت داخل المشغل، حيث تتدرّب فى البداية على كيفية أخذ المقاسات وقص القماش: «باعلمها إزاى تعرف تقص الباترون وإزاى تاخد مقاسات ابنها، والحاجات الأساسية اللى تقدر تفصّل من خلالها بنطلون وبلوزة أو تيشيرت وفستان لطفل».
وتُعد هذه هى السنة الأولى التى يقوم فيها «يوسف» بطرح المبادرة الخاصة به: «تنفيذ الفكرة كان يتطلب بعض التنظيم علشان نوفر الخامات والكل يستفيد».