«بل البلح» وتوزيع وجبات على الصائمين.. مهمة عمال مسجد «بستان الفاضل»

10:40 م | الأحد 10 يونيو 2018

بعد أداء صلاة المغرب، وذهاب المصلين لتناول الإفطار داخل منازلهم أو على إحدى موائد الرحمن المجاورة، يتجمعون حول حصيرة صغيرة بجانب منبر مسجد بستان الفاضل، بحى المنيرة، تتراص أمامهم الحلل والصوانى والأطباق المليئة بالطعام، لكسر صيامهم والإفطار، قبل بدء استعداداتهم لاستقبال المصلين لأداء صلاة التراويح.

من الساعة العاشرة صباحاً يفتح عم جمال جودة باب المسجد الذى يقيم فيه منذ بداية شهر رمضان، لتحضير كميات كبيرة من البلح، والتمر هندى، بمساعدة العاملين معه وبعض المتطوعين، لتوزيعها على المارة والمصلين أثناء رفع أذان المغرب، بجانب إرسال وجبات طعام للصائمين فى مستشفى الأطفال «أبوالريش» كعادة كل عام.

«كل يوم بنبلّ مع الناس 50 كيلو بلح، ومعاهم 10 كيلو موز، وزيهم تفاح، وأنقعهم فى الميه بعد التحلية لحد ميعاد الفطار، ونوزعهم أمام باب المسجد، وعمال المحلات اللى جنبينا بييجوا ياخدوا بلح، والمائدة اللى جنبنا، وجيرانا فى المنطقة بيعملوا الوجبات، وإحنا بنوزعها داخل المستشفى».

بعد الانتهاء من تناول وجبة الإفطار المكونة من الخضار المطبوخ والأرز والفراخ المشوية التى يرسلها إليهم خصيصاً أحد مطاعم المشويات بالمنطقة، يقوم عم جمال بتنظيف المكان لاستقبال مصلى التراويح، وهو يقول: «من أول يوم فى رمضان مافطرتش ولا اتسحرت فى بيتى، كل يوم لازم أنام فى المسجد عشان كل حاجات رمضان اللى بتجيلنا من أهل الخير فى عهدتى، ومسئول عنها لحد آخر يوم فى رمضان، ولازم أشرف عليها».

فى حين يقوم العاملون الذين يصل عددهم لفردين بالتحضيرات داخل المسجد وفحص الميكروفون، يتولى جودة، فرش عدد من الحُصر أمام المسجد للصلاة عليها بعد امتلاء المسجد من الداخل بالمصلين: «فى رمضان كل حاجة بتبقى فيها الخير وبزيادة، حتى عدد المصلين بيبقى مالى المسجد والشوارع، والحصير ده فى الأيام العادية مابيطلعش غير ساعة صلاة الجمعة عشان الناس بيبقوا كتير فى اليوم ده بس».