طبيب يفاجئ المرضى بتوزيع «كحك»: تعالوا زورونا كل عيد

10:15 م | السبت 16 يونيو 2018

أراد أن يصنع حالة من البهجة داخل عيادته بالإسكندرية، قرر طبيب الأسنان الشاب، محمود محمد، عمل مفاجأة سارة للمرضى، وهى توزيع علب كعك وبسكويت عليهم، بعضهم قرر أخذ الكعك معه، وآخرون أكلوا منه داخل العيادة، مرددين بخفة ظلّ: «إحنا كده أسنانا هتوجعنا أكتر بسبب الكحك والبسكويت، وهنضطر نيجى نكشف تانى فى العيادة». يشعر «محمود» بالسعادة، بسبب حالة الفرحة والبهجة التى ظهرت على وجوه المرضى، رغم ألم الأسنان: «أكتر موقف بسطنى لما وزّعنا الكحك والبسكويت على الناس فضلوا يقولوا إحنا كده هنجيلك على طول.. سواء علشان نكشف أو ناكل».

اعتاد الطبيب على عمل مفاجآت للمرضى بعيادته من وقت لآخر، خاصة فى أوقات الأعياد والمواسم: «فى رمضان وزّعنا بلح وياميش، وحتى فى مولد النبى بنوزع حلويات المولد». التوزيع يكون بكميات محدودة غرضها إدخال البهجة والسرور على المرضى: «العلبة بتبقى كيلو وشاملة كل حلويات العيد من كحك وبسكويت وبيتى فور وغُريبة والحاجات دى بتفرحهم». بعد توزيع الحلوى، يحرص الطبيب الشاب على توجيه النصائح الطبية الخاصة بسلامة الأسنان، كغسل الأسنان عقب تناول الحلوى مباشرة، حتى لا تتسبب فى تسوسها.