الأسعار تواصل الصعود فى أسواق القاهرة والجيزة.. والمواطنون: «فين الرقابة؟»
بائعو الخضار والفاكهة يشكون انخفاض عمليات الشراء بسبب ارتفاع الأسعار
شهد عدد من أسواق القاهرة والجيزة ارتفاعات جديدة فى أسعار بعض السلع، كالدجاج واللحوم الحية والخضراوات والفاكهة، فضلاً عن المواصلات، التى زادت أسعارها بنسبة أكبر مما حددته الدولة، بعد مرور نحو 10 أيام من زيادة أسعار الوقود، وعبَّر عدد من المواطنين عن استيائهم من الارتفاعات الأخيرة، مطالبين بتشديد الرقابة على الأسواق، ووضع آلية واضحة للإبلاغ عن المخالفين.
وعبَّر محمد كامل، 51 عاماً، من عين شمس، عن استيائه من ارتفاع الأسعار، مطالباً بزيادة الرقابة على الأسواق، وأضاف: «كنت زمان بجيب كل حاجة براحتى من الخضار والفاكهة وما بعملش حسابى، دلوقتى بقيت مجبر أحسبها بالورقة والقلم عشان الميزانية ما تخلّش بيا، وخصوصاً إن فيه تجار زوّدت الأسعار بشكل مبالغ فيه»، وتابع: «الأنبوبة الدولة قالت إن سعرها الرسمى 50 جنيهاً، لكن فوجئنا بأن سعرها فى السوق وصل 70، وهذه الزيادة غير منطقية ومش مستوعبها لحد دلوقتى». ولم يختلف رأى «أم ياسمين»، 37 عاماً، من حى الدقى، حيث قالت: «الخضار غلى وبقى الطاق طاقين، وبنزل بـ100 جنيه يا دوب أجيب بيها تمن أكلة فى اليوم، والفاكهة نسيتها وما بقتش أجيبها للعيال فى البيت». ويقول محمد على، 53 عاماً، أحد سكان حى الدقى: «بشترى الأنبوبة من الراجل اللى بيعدى فى الشارع بـ75 جنيه، وده لأن مافيش عندنا مستودع، وعربية الأنابيب بتاعت الوزارة بتعدى كل فين وفين»، مضيفاً: «السوق للأسف ما بقاش فيه سيطرة عليه، بيبقى فيه بياعين مخزنين بضاعة وبيعرضوها بالسعر الجديد».
بائعو الخضار والفاكهة: الارتفاعات 40% وحالنا واقف.. والجزارون: اللحمة زادت 5 جنيهات والكبدة بـ140.. والسائقون: «التعريفة الجديدة ظلمتنا».. و«على»: أنبوبة البوتاجاز بـ75 جنيهاً
وعبّر عامر حسن، ٣٥ عاماً، بائع خضار وفاكهة بمنطقة المطرية، عن استيائه من ارتفاع الأسعار، موضحاً: «الأسعار زادت ٤٠٪ بعد ما البنزين غلى، وكنت بجيب عربية فيها ٢ طن بـ٦٠٠٠ جنيه، دلوقتى بجيبها بـ7000 بالميت»، وأضاف: «الحاجة غليت من هنا والسحب قلّ عليها وبقى يا دوب ١٠٪ اللى بيشتروا، مش زى الأول، واضطريت أقلل عدد الصنايعية معايا عشان أقدر أدفع للباقى»، أما عن الأسعار فقد بلغت ٦ جنيهات لكيلو الطماطم، والخيار يتراوح بين ٨ و١٠ جنيهات، والبطاطس والبصل بـ٥ جنيهات، و١٢ جنيهاً للتفاح و١٠ جنيهات للعنب»، حسب قوله.
وأوضحت «أم محمد»، 38 سنة، صاحبة محل فاكهة وخضار بحى حلمية الزيتون، أن أغلب البضاعة أصابها العفن نتيجة قلة الإقبال عليها، مشيرة إلى أن سعر البطاطس بلغ 6 جنيهات بعد أن كانت بـ2.50 و3 جنيهات، وتصدر الليمون قائمة الزيادات ليصل إلى 25 جنيهاً بعد أن كان سعره 10 جنيهات فقط، وارتفع سعر الكوسة نحو 2 جنيهات ليصبح سعر الكيلو 10 جنيهات. ولم يختلف الأمر كثيراً بالنسبة لأحد البائعين بشارع سليمان جوهر بحى الدقى، الذى أشار إلى أن زيادة الأسعار أثّرت عليه بشكل سلبى: «زيادة الأسعار جت عليّا وعلى ناس كتير، دلوقتى، والزبون بقى بياخد ربع أو نص كيلو من كل حاجة والبضاعة بتبوظ عندى».
وتفاوتت أسعار الدواجن والطيور الحية بمنطقتى الدقى وعين شمس، فى الفترة الأخيرة، بعد زيادة سعر الوقود، حيث يقول سمير صابر، 43 عاماً، صاحب محل دواجن: «أسعار كيلو الفراخ البيضاء بـ32 جنيهاً والحمراء بـ37 والبانيه بـ65، وحركة البيع والشراء نايمة، بينما زاد الإقبال على الدواجن البيضاء نظراً لانخفاض سعرها»، ويوضح حمادة عادل، 40 عاماً، صاحب محل دواجن بمنطقة عين شمس: «كيلو الفراخ البيضاء بـ33 جنيهاً والحمراء بـ38، والبانيه بـ75».
أما أسعار اللحوم الحية فى منطقة الدقى فقد شهدت ارتفاعاً ملحوظاً مقارنة بمنطقة عين شمس، خاصة بعد عودة محلات الجزارة والمدبح للعمل بعد انقضاء إجازة عيد الفطر، ويوضح عرابى محمود، 45 عاماً، جزار بمنطقة عين شمس أن سعر كيلو اللحوم ارتفع 5 جنيهات، ويضيف: «النهارده أول يوم فى زيادة أسعار اللحمة، لأن المدبح كان قافل من ساعة العيد، وده أول يوم له، وكيلو اللحمة كان بـ130 جنيه ودلوقتى بـ135 جنيه، لكن مش هبيعه بالسعر ده لحد ما أشوف باقى الجزارين هيعملوا إيه، لأنها احتمال فى الوقت الجاى تزيد أكتر»، ويضيف أن سعر كيلو الكبدة و«البفتيك» وصل لـ140 جنيهاً بعد أن كان بـ135، بينما يقول أحد الجزارين بمنطقة الدقى، إن أسعار اللحوم لم ترتفع منذ نحو شهر، ويضيف: «كيلو اللحمة الضانى بـ150 جنيه وهو كده من حوالى شهر وكمان البفتيك بنفس السعر، وللأسف حركة البيع والشراء قليلة جداً».
وبالنسبة لأنابيب البوتاجاز توضح «أم سامح»، 45 عاماً، بائعة أنابيب بوتاجاز بشارع الأربعين، أنها تبيع الأسطوانات منذ 10 سنوات، وأسعارها ارتفعت أكثر من الضعف: «الأنبوبة كنت ببيعها بـ45 جنيه قبل ما البنزين يزيد، لكن دلوقتى باخدها من المستودع بـ55 وبدفع 5 جنيه للتوك توك عشان أنقلهم، فبضطر أبيعها بـ65 جنيه وأكسب فى الواحدة 5 جنيه بس».
وشهدت أسعار المواصلات ارتفاعاً بنحو جنيه زيادة على التعريفة المقررة، وقال محمد كمال، 32 عاماً، موظف فى شركة السويدى: «أنا بركب يومياً عربيات أبوحماد - السلام، وبعد الزيادة السواقين رفعوا الأجرة 15 جنيه لوحدهم»، ويقول أيمن محمد على، 24 عاماً، عامل بمدينة العبور: «أنا بركب من خط بلبيس - السلام يومياً، والسواقين مش ملتزمين بالتعريفة»، وأضاف: «الناس اعترضت أكتر من مرة وبعد المخالفات السواقين خافوا والتزموا بالتعريفة الجديدة وهى 8 جنيه ونُص».
ويقول مصطفى خالد، 26 عاماً، محاسب: «بركب كل يوم خط بدر، وكل واحد بيشتغل بمزاجه، والأجرة 7 جنيه بعد الزيادة، وبيطلبوا 8»، مضيفاً: «بيمشوا فى خط سير مخالف وأطول علشان يغصبوا الناس على الدفع». ويقول أحمد موسى، 41 عاماً، سائق بموقف السلام خط مدينة بدر - السلام: «التعريفة الجديدة ظلمتنا».