وردة لتخليد ذكريات العشاق بـ15 ألف جنيه.. حضرتك بتقول كام؟
وردة لتخليد ذكريات العشاق
مجالهم يجذب عشاق الورد والمولعين بالاحتفاظ به ليخلد ذكرياتهم والتواريخ المهمة فى حياتهم، فهم يتمكنون من الاحتفاظ بالزهور مشرقة ومزهرة وبنفس رونق طلتها الأولى لمدة تزيد على 15 عاماً، سارة الطباخ، مسئولة عن أحد محال الزهور بالطريق الصحراوى، حرصت على العمل بهذه الأنواع من الزهور على سبيل التغيير والتفرد: «إحنا بنجيبه ونشتغل فيه بالطلب لأن سعره غالى جداً».
يتراوح سعر الوردة الواحدة بين 5 و15 ألف جنيه، فهم يقومون بحفظ الورد الطبيعى بعيداً عن الماء والشمس: «هى أنواع معينة من الورد بيتم استخدامها مبردة عشان تحتفظ بشكلها ورونقها، وبتتجاب من إنجلترا مضافة إليها مادة هى اللى بتحافظ عليها»، ويعد الإقبال على الورود من هذا النوع محدوداً: «الاهتمام بالورد ولغة الزهور قل جداً، الناس بقت تستخسر تشترى وردة بـ5 جنيه.. مش أى حد بيجازف ويدفع الرقم ده فى ورد خصوصاً لو مقبل على الجواز».
وبحسب «سارة» فإن الورد يتم استيراده من الإكوادور وإنجلترا: «هما اللى بدأوا فى الموضوع ده»، وتعد الأعياد هى أكثر المواسم التى يزداد فيها الإقبال على الورد، خاصة بين الكابلز: «فيه كتير مخطوبين بيحبوا إنهم يوثقوا الذكريات بينهم بالورد»، وبحسب قولها فئة معينة هى من تقبل على شراء هذا النوع من الورود: «دى حاجة للناس المرفهة جداً، عشان كده بشتغلها بالطلب لأنى لو اشتغلت فيها بس هخسر».
وعن حجم هذه الزهور فإنه يفوق أحجام الزهور الطبيعية: «إحنا بنحتفظ بيها داخل صندوق زجاج أو زهريات من البورسلين أو ماء الذهب».