فيلم وثائقى للشقيقين «كريم ودنيا»: هكذا يكون الحب غير المشروط
الشقيقان «كريم» و«دنيا»
قرّروا توثيق حكاية «كريم» و«دنيا»، الشقيقين اللذين ضربا مثالاً فى الحب والتضحية، «دنيا»، 18 عاماً، تبرّعت لشقيقها «كريم»، 23 عاماً، بفص من الكبد، مما دفع عدداً من أصدقائهما إلى تسجيل قصة الحب تلك فى فيلم وثائقى مدته 7 دقائق و40 ثانية، يتحدثان فيه عن حكاية الشقيقين الإنسانية، وهى فكرة اقترحها بيشوى بوشكاش، وتحمّس لها جوزيف فايز، الذى أخرج الفيلم، رغم عدم معرفته ببطلى القصة، وصورها أندرو عادل.
الفيلم يحمل اسم «أعظم مثال فى الحب»، واستغرق تصويره يومين، والمونتاج يومين آخرين، وحسب «جوزيف»، فإنه تحمّس للحكاية، لأنه يراها تطبيقاً عملياً لنظرية الحب غير المشروط: «يعنى حد يحب حد، ومايتردّدش إنه يدى له أى حاجة، حتى لو من جسمه، العملية كانت خطر جداً، ودنيا كانت صغيرة، وفضلت مستنية لحد ما تكمل 18 سنة، علشان تتبرّع لأخوها المصاب بمرض نادر».
يبدأ الفيلم بلقطة تتحدث فيها صديقة، تقول: «أجمل حاجة فى الدنيا إنه يبقى عندك كريم ودنيا فى حياتك»، ثم كلمات من الأصدقاء مثل «أنا فخورة بيكى جداً»، «اللى انتم عملتوه ده تطبيق لجملة الحب غير المشروط، شكراً ليكم»، «كمية الحب أنها تدى حتة منها لأخوها، دى حاجة مابتحصلش، أنا سمعت أن المرض اللى كان عند كريم بيحصل لواحد فى المليون، انت يا كريم ربنا رزقك بأخت، واحدة فى المليون»، ثم يأتى فاصل بكوبليه أغنية لمحمود العسيلى: «أنا أقرب ليك من حبل وريدك ياخد إيدك هينجيك، إوعى تخاف أبداً».
ويختتم الفيلم برسائل الأصدقاء: «إحنا بنحبكو جداً، ودى كانت حاجة مننا كلنا علشان نقول لكم، شكراً، علشان علمتونا حاجات كتيرة، حبينا نفرحكم وبنقول لكم أنتم مش لوحدكم، إحنا معاكم».