بريد الوطن| ما اتكتبش
صورة أرشيفية
فى شعر لسه ماتكتبش
جوه بير الليل بيبكى
مستنى شىء م الخوف يمر
مش كل طير ف الدنيا حر
ولا كل سقف اشتاق مطر
ينشع قصايد أو يخر
فى حرف لساه ع الببان
فقير يبان
وسطوره باهتة مقطعة
والصورة من زيف الحنين
متلملمة ومترقعة
بيدق بكفوف المنى
وأفتح أنا
وأترعش أحزان وخوف
يتحدف ف عنيا ضيه
وأبقى زيه
بترمى ف حضن العمى
وبقدر أشوف
وألقانى بكتب محض صدفة
أو ظروف
وألقانى عارفة
إن لسه عندى ياما ماتكتبش
«وكل ما قد قيل صدفة»
والصدف مبتتحسبش
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com